Төв аймгийн Сэргэлэн сумынхан 22000 га газрыг нь ТУСГАЙ ХЭРЭГЦЭЭНД авахыг эсэргүүцэж, шаардлага хүргүүллээ

Төв аймгаас Сэргэлэн сумын нутаг дэвсгэрээс 22 мянган га газрыг улсын тусгай хэрэгцээнд авах шийдвэрийг гаргажээ. Үүнийг эсэргүүцсэн нутгийн иргэд болон малчдын төлөөлөл өнөөдөр /2021.03.22/ Төрийн ордны гадна жагсаал зохион байгуулж, мэдээлэл хийлээ.

Тэд дээрх шийдвэрийг эсэргүүцэж Төв аймгаас парламентад сонгогдсон УИХ-ын гишүүн Ц.Туваан, Н.Энхболд, Ж.Батжаргал нар болон Барилга, хот байгуулалтын сайд, Төв аймгийн Засаг дарга нарт албан шаардлага хүргүүлж байгаагаа мэдэгдэв.

Энэ талаар тэд хэлэхдээ "Малчдад тохиолдсон бэрхшээл маш их бий. Сэргэлэн сумын гуравдугаар багийн нутагт Майдар хотыг байгуулна гэж 12 мянган газ газрыг тусгай хэрэгцээнд авсан. Өвөлжөө, хаваржаа нь нурчихсан. Отрын байдалтай байна. Гэтэл тэр 12 мянган га газарт ямар ч бүтээн байгуулалт байхгүй. Одооны 22 мянган га газрыг тусгай хэрэгцээнд авах гэж байгаа эрх мэдэлтнүүдийн газрын наймаатай холбоотой гэж хардаж байна. Судлаад үзэхээр Ерөнхийлөгчтэй холбоотой байдаг юм билээ. Сум, орон нутгийн удирдлагууд малчид биднийг гуйхгүй, авахаа авна гээд л хүчээр асуудлыг шийдэж байна шүү дээ" хэмээн тодотголоо.