Гэрээр эмчлүүлэх иргэдэд тусламж үзүүлэх автомашин ажиллуулж байна

Гэрээр эмчлүүлж байгаа иргэдэд тусламж үйлчилгээ үзүүлэх тусгай автомашин ажиллуулж байна.

Коронавируст “Ковид-19” халдварын тохиолдол нийслэлд нэмэгдэж буйтай холбоотойгоор хөнгөн хэлбэрээр өвчилсөн иргэдийг гэрээр эмчлэх, мөн ойрын хавьтлыг гэрийн тусгаарлалт, ажиглалтад шилжүүлж эхэлсэн билээ.

Энэ хүрээнд Нийслэлийн онцгой комиссоос гаргасан шийдвэрийн дагуу гэрээр эмчлүүлж байгаа иргэдэд эрүүл мэндийн тусламж үйлчилгээ үзүүлэх тусгай зориулалтын автомашиныг ажиллуулж эхэллээ.

Дээрх иргэдэд төрөлжсөн нарийн мэргэжлийн тусламж үйлчилгээг үзүүлэх шаардлагатай тохиолдолд яаралтай үйлчлэх түргэн тусламжийн автомашин болон нарийн мэргэжлийн эмчийн багийг томилсон байна.

Энэхүү тусгай зориулалтын түргэн тусламжийн автомашин нь сүүлийн үеийн дэвшилтэт технологи бүхий эмнэлгийн зөөврийн тоног төхөөрөмжөөр иж бүрэн тоноглогдсон бөгөөд иргэдэд эрүүл мэндийн 10 гаруй төрлийн тусламж үйлчилгээг үзүүлэх боломжтой юм.

Эх сурвалж: Нийслэлийн онцгой комисс