Өнгөт хувьсгал өрнүүлээд өөдөлсөн түүх байхгүй

Ард иргэд нүүрсний хулгайчийг нийтэд зарлахыг шаардсан жагсаал эхлүүлж байсан бол өрнөл хэсэгтээ Засгийн газрыг огцруулж, парламентыг тараахаар үргэлжилсэн. Ийнхүү долоо хоног өрнөсний эцэст тогтолцоо, Үндсэн хуулийг өөрчлөхийг шаардах болов. Харин тайлал хэсэгт аанай л Засгийн газар, парламент руугаа ноцох шинжтэй. Мөн парламентад суудалгүй улс төрийн намууд жагсаалд оролцож байгаа нь тэмцэгчдийг өөр зүгт эргүүлж, чамгүй хурцадмал болгож мэдэхээр байна.

Олон улсад Монголд өрнөж байгаа энэхүү үйл явдлыг ихэд анхаарч нөлөө бүхий хэвлэлүүдэд “Монголын олон мянган иргэд авлига, нүүрсний хулгай, инфляцыг эсэргүүцэж, зарим нь Төрийн ордон руу дайрахыг завдав” хэмээн мэдээлжээ.

Иргэдийн тайван жагсаалд хөндлөнгийн улс төрийн нөлөө орох нь аль аль талаараа аюултай. Тиймээс өнгөт хувьсгал руу орж, эмх замбараагүй байдал үүсэх вий гэсэн айдас хаа хаанаа бий. Энэ бол үндэсний тусгаар тогтнолд аюул заналхийлж байгаа хэрэг болно. Өнгөт хувьсгал нь харийн дэмжлэгээр төрийн эрхийг хууль бусаар авахыг л хэлээд байгаа юм.

Ийм тохиолдолд үндэсний тусгаар тогтнол, бүрэн эрхт улс гэж нэрлэх ямар ч аргагүй болно. Шуудхан хэлэхэд манайх шиг буурай орон Монгол Улс гэж хэлэх аргагүй болох аж. Учир нь аль нэг нөлөө бүхий гүрний хөрөнгө дэмжлэгээр хийсэн үймээнд ямар үндэстний үнэ цэн хадгалагдаж үлдэх юм. Тиймээс иргэд олон нийт гадна дотны улс төрийн нөлөөнд автахгүй тайван замаар тэмцлээ илэрхийлэх нь чухал. Өнгөт хувьсгал өрнүүлээд өөдөлж байсан түүх дэлхийн хэмжээнд байхгүй.

Цөөн жишээ дурдахад Югославт Ерөнхийлөгчийн ээлжит бус сонгууль болж, сөрөг хүчний Үндэсний ардчилсан намын тэргүүн Воислав Коштуница ялалт байгуулжээ. Гэвч Сонгуулийн төв хороо түүнийг 50 хувийн санал аваагүй хэмээн үзэж, санал хураалтын хоёр дахь шатыг зарласан. Хоёр долоо хоногийн дараа олныг хамарсан эсэргүүцлийн жагсаал, цуглаан болж, “хувьсгал”-ын үр дүнд Югослав олон жижиг улс болж, бутрах эмгэнэлт түүхийг үлдээсэн байдаг.

Үүнээс гадна Муаммар Каддафийн үед Ливид дундаж цалин нэг мянган ам.доллар авч нийгмийн амьдрал боломжийн байсан ч Муаммар Каддафийг хөнөөж “хувьсгал” өрнүүлснээс хойш нөхцөл байдал хүндэрсэн. Хувьсгалын дараа Ливи иргэний дайны хөлд нэрвэгдэж, хэд хэдэн хэсэг болон хуваагдсан. Өнгөт хувьсгал нь сул дорой улс орныг онилдог гэдгийг мартаж болохгүй.

Тухайлбал, Гүрж, Украин, Ливан, Палестин, Киргиз, Югослав, Кувейт, Ливи, Мьянмар, Төвд, Иран, Армен зэрэг орнуудад хувьсгал өрнөж байсан ч өнөөдөр нөхцөл байдал ямар байгааг надаар хэлүүлэх юун. Эдгээр улсын дийлэнхийг АНУ-аас санхүүжүүлж байжээ. Лавтай Украйны хувьсгалыг АНУ-аас 14 сая ам.долараар санхүүжүүлсэн. Хожим үүний хор уршгаар хөрш зэргэлдээ ОХУ-тай ямар байдалд хүргэснийг бид мэднэ.

Ямартай ч иргэд олон нийт тайван замаар тэмцлээ хийж, улс үндэстнийхээ тусгаар тогтнолыг бүрэн авч үлдэхийн төлөө гадна, дотны нөлөөнд автахгүй ухаантай хөдлөх нь чухал болоод байна.

 Эх сурвалж: Өглөөний сонин