ӨГЛӨӨНИЙ МЭНД!

Өнөөдөр 2023.04.14. Билгийн тооллын 24. Монгол эх оронд маань нар 06 цаг 06 минутад мандлаа. 19 цаг 39 минутад жаргана.

Улаанбаатар хотод багавтар үүлтэй. Өдөртөө 5 хэм, шөнөдөө -10 хэм. Та хувцсаа тохируулж өмсөөрэй.

Өнөөдөр Японд Хаврын Такаяма Мацүри баяр, Лаост Бун Пимай шинэ жил, Анголд Залуусын баяр, Унгарт Номын санчдын өдөр, Мьянмарт Тинжян усны баярыг тэмдэглэж байна.

Энэ өдөр сүмогийн 70 дахь их аварга Харүмафүжи Кохэй Бямбадорж, дэлхийд анх удаагаа нугасны хорт хавдрыг авах мэс заслыг хийсэн Английн мэдрэлийн мэс заслын эмч Виктор Горслей, уран зөгнөлт зохиолч Брюс Стерлинг, АНУ-ын жүжигчин Эдриен Броуди зэрэг алдартан мэндэлжээ.

Энэ өдөр дэлхий дахинд болсон онцлох үйл явдлууд:

1543 оны энэ өдөр Сан Франциско буланг нээсэн Бартоломео Феррелогийн экспедицийн аялал дуусжээ.

1849 оны энэ өдөр Унгарын босогчид Унгар улс Австриас тусгаар тогтносон тухай зарлажээ.

1865 оны энэ өдөр АНУ-ын 16 дахь Ерөнхийлөгч Авраам Линкольн үхлийн шарх авч, маргааш өдөр нь нас барсан байна.

1871 оны энэ өдөр Германы Рейхстаг парламент үүсгэн байгуулагджээ.

1912 оны энэ өдөр “Титаник” хөлөг онгоц мөсөн уултай мөргөлдөв.

1927 оны энэ өдөр Шведийн Гётеборге хотод анхны “Volvo” автомашиныг үйлдвэрлэжээ.

1991 оны энэ өдөр Ван Гогийн музейгээс нийт 500 сая ам.долларын  20 зураг алдагдав.

2010 оны энэ өдөр Төвөдийн Юшу хотод 6.9 магнитудын хүчтэй газар хөдлөлт болсны улмаас 2700 орчим хүн амиа алджээ.

Өнөөдөр үс засуулвал Өвчин эмгэг ирнэ.

Эл өдөр морь, нохой жилтнээ аливаа үйлийг хийхэд эерэг сайн бол бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлд шамдах, бүтээл туурвил эхлэх, худалдаа арилжаа хийх, бизнес эхлэх, зэрэг дэвших, хараал жатгыг буцаах, амилуулах, өглөгийн түллэг хийх, хишиг дуудуулах, хот балгадын үйл, цэрэг, цагдаагийн үйл, андгай тангараг, гэрээ хэлцлээ буцаахад сайн. Харин золиг гаргах, бомбын үйл, хүүхэд хөлд оруулахад муу. Өдрийн сайн цаг нь хулгана, үхэр, луу, могой, хонь, нохой.

Хол газар явах бол баруун урагш мөрөө гаргаад аян замдаа гараарай.

Өнөөдрийн ажилд тань амжилт хүсье.