ӨГЛӨӨНИЙ МЭНД!

Өнөөдөр 2023.04.21. Билгийн тооллын 1. Монгол эх оронд маань нар 05 цаг 52 минутад мандлаа. 19 цаг 50 минутад жаргана.

Улаанбаатар хотод багавтар үүлтэй. Өдөртөө 3 хэм, шөнөдөө -7 хэм. Та хувцсаа тохируулж өмсөөрэй.

Өнөөдөр Энэтхэгт Төрийн үйлчилгээний өдөр бол ОХУ-д Автономит эрхтэй улсуудын өдөр, Кенид Мод тарих үндэсний өдөр, Вьетнамд Номын өдөр тохиож байна.

Энэ өдөр Америкийн дуучин, гитарчин, төгөлдөр хуурч Игги Поп, жүжигчин, фото модель Энди Макдауэлл, Их Британийн дуучин Роберт Смит, Мальдивын Ерөнхийлөгч Абдулла Ямин, Шотландын жүжигчин Жеймс Макэвой, Канадын хоккейч Венсан Лекавалье, Украины эстрадын дуучин Анастасия Приходько зэрэг алдартан мэндэлжээ.

Энэ өдөр Монгол Улсын түүхэнд болсон онцлох үйл явдлууд:

2013 оны энэ өдөр Африкийн Нигер улсад нөхрийнхөө хүчирхийлэлд байсан гэх Монгол Улсын иргэн С.Энхмаа хоёр хүүхдийн хамт эх орондоо иржээ.

2015 оны энэ өдөр Микроавтобусны үйлчилгээ эрхлэгчид буюу Хувиараа тээвэр эрхлэгчдийн үйлдвэрчний эвлэлийн нэгдсэн хорооны гишүүд УИХ-ын дарга, Ерөнхий сайд, нийслэлийн Засаг дарга нараас шинэ микроавтобус авч өгөхийг шаардаж, жагсаал зохион байгуулжээ.

Энэ өдөр дэлхий дахинд болсон онцлох үйл явдлууд:

1967 оны энэ өдөр Грект армийн хурандаа Ж.Пападопулосоор удирдуулсан цэргийн бүлэглэл төрийн эргэлт хийжээ. Ийнхүү Грек улс долоон жилийн турш цэргийн дэглэмд шилжсэн билээ.

1989 оны энэ өдөр Хятадын шинэчлэлийн төлөө тууштай тэмцэгч, ардчиллын лидер гэгдэх Ху Яаобангийн дурсгалыг хүндэтгэсэн 100 мянган оюутан Тиананьмен талбайд цуглаж, тайван жагсаал хийв.

2019 оны энэ өдөр Украины Ерөнхийлөгчийн сонгуулийн хоёрдугаар шатанд Владимир Зеленский сонгогчдын дийлэнхийн саналыг авч, ялалт байгуулав.

Өнөөдөр үс засуулвал Нас ахар болно.

Эл өдөр үхэр, могой жилтнээ аливаа үйлийг хийхэд эерэг сайн бол бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр гэмтнийг шийтгэх, лусыг тахих, хагалгаа хийлгэх, буг дарах, газрын ам бооход сайн. Харин мод суулгах, нарийн зөвлөгөөн хийх, сэтгэлд сэвтэй газар очих, байшингийн суурь тавих, угаал үйлдэхэд муу. Өдрийн сайн цаг нь хулгана, бар, туулай, морь, хонь, тахиа. Дашням өдөр.

Хол газар явах бол баруун хойш мөрөө гаргаад аян замдаа гараарай.

Өнөөдрийн ажилд тань амжилт хүсье.