Х.Нямбаатар: Энхтайваны гүүрний ашиглалтын хугацаа дууссан

Нийслэлийн Засаг дарга Х.Нямбаатар Энхтайваны гүүрний ашиглалтын хугацаа дууссанаас хойш 13 жил өнгөрч, гүүрэнд цууралт өгч эхэлсэн тухай өөрийн байр суурийг илэрхийлжээ. 

Энэ тухай тэрээр "Энхтайваны гүүрний ашиглалтын хугацаа дууссан. Шууд хааж засахад таг түгжрэх тул бид энэ трамвай төслийг эхлүүлж, трамвайд зориулсан зэрэгцээ гүүрний бүтээн байгуулалтыг хийхээр төлөвлөсөн. Улмаар автын хөдөлгөөнийг шинэ баригдах гүүр рүү шилжүүлэх замаар Энхтайван гүүрийг засахаар төлөвлөсөн" гэжээ. 

Нийслэлийн Иргэдийн төлөөлөгчдийн хурал 2026 оны төсөвтөө тодотгол хийхээр хэлэлцэж эхлээд байна. “Улаанбаатар трамвай” төсөлд 350 тэрбум төгрөг зарцуулахаар тусгаад байгаа бөгөөд төслийн хүрээнд трамвайн хоёр шугамыг төлөвлөсөн. Нэгдүгээр шугам нь Зунжин худалдааны төвөөс Сүхбаатарын талбай хүртэл 11 км урттай, нийт 16 зогсоолтой байх бол хоёрдугаар шугам нь Сүхбаатарын талбайгаас Архивын ерөнхий газар хүртэл 15 км урттай, 23 зогсоолтой байх ажээ.