Автомашингүй өдрөөр Баянголчууд гимнастик хийлээ

Амралтын өдөр тохиосон энэхүү арга хэмжээг Баянгол дүүргийнхэн үр дүнтэй тэмдэглэж өнгөрүүлсэн аж. Тухайлбал, тус дүүргийн иргэд Улаанбаатар их дэлгүүрээс баруун дөрвөн зам хүртэлх 840 метр квадрат газарт цуглан олон төрлийн ажил зохион байгуулжээ. Баянгол дүүргийн ЗДТГ, Эрүүл мэндийн нэгдэл, Боловсролын хэлтэс, Замын цагдаа, Нийгмийн даатгал, Татварын хэлтэс, Халамж үйлчилгээний төв зэрэг 18 байгууллага нэгэн дор иргэдэд үйлчилж, хэрэгцээтэй мэдээ мэдээллээр ханган ажилласан юм.

Баянгол дүүргийн Цэргийн штабыг төлөөлөн Үлгэр жишээ үлээвэр найрал хөгжим, мөн Монгол цэргийн баяраар Ерөнхий боловсролын сургуулиудын дунд зохион байгуулсан “Дөл” тоглолтын аваргууд энэ өдрийн үйл ажиллагааг чимлээ. Биеийн тамир, спортын хорооныхон ч шатар, даам, олс таталтын тэмцээнийг иргэдийн дунд зохион байгуулж, Эрүүл мэндийн нэгдлийнхэн идэвхитэй хөдөлгөөнтэй байхыг уриалан нийтийн гимнастик зохион байгуулсан аж. Мөн эрчим хүчинд хэмнэлттэй, бүрэн шаталттай зуухны захиалга авч, Хөдөлмөрийн хэлтсийнхэн аж ахуй нэгжүүдэд зарим ажил горилогчийг зуучлах зэрэг олон үйл явдал энэ үеэр өрнөв.

Р.Есүй