Т.Аятунгаа нуугдаж, охиноо сэм эрэхээр шийджээ

Тавхан сартай охиноо хулгайд алдсан гэх Т.Аятунгаа гэнэт гарч ирж олныг бужигнуулсан  шигээ төд удалгүй сураг алдрав. Мисс, фото модель бүсгүйн ханилсан гадаад эр бяцхан охин Тэргэлсарыг нь аваад алга болсон төдийгүй түүнийг Интерполоор эрэн сурвалжилж байгаа мэтээр олонд таниулсан гэдэг. Түүгээр ч үл барам, охиноо хүнд гэмтээсэн хэмээн элдэв бичиг, зураг сэлт дэлгэсэн нь одоо ч хүмүүсийн амны зугаа болж байна. Юутай ч, эл хэргийн тухай хэвлэл мэдээллийн хэрэгслээр олон талаас нь мэдээлсэн тул илүүц зүйл нуршаад яахав.

Ч.Тэргэлсар нэртэй бяцхан охиныг хүний наймааны золиос болсон байж магадгүй хэмээн үзэж манай Хүний эрхийн үндэсний комиссоос Филиппин улсын хүний эрхийн байгууллагад хандан захидал илгээсэн  гэнэ. Өнөөг хүртэл сураг нь гараагүй бяцхан охиныг олох тал дээр хамтран ажиллаж,  эх оронд нь эрүүл саруул авчрах асуудалд анхаарч туслахыг энэхүү захидлаар дамжуулан хүсчээ. Гэвч мисс бүсгүйн нөхөр болох  Чарльз Эрген гэх филиппин эр олон улсын иргэншилтэй учраас олоход нэлээд хүндрэл учирч болзошгүй байгаа юм байна.

Одоогоор Филиппин улсын хүний эрхийн байгууллагаас манай ХЭҮК-т хариу ирүүлээгүй байгаа бөгөөд Т.Аятунгаа бүсгүй эрлээ үргэлжлүүлж яваа сурагтай. Хэн гэдгийг нь ч сайн таньж амжаагүй харийн эрд өврөө нээж, нялх охиноо алдсан түүнийг өөлж муучилсан олны хэл амнаас залхахдаа хэсэг хугацаанд нам гүм байж, Ч.Тэргэлсар охиноо сэм эрэхээр шийдсэн бололтой.

С.Цахиур