Томуугаас сэргийлэхийн тулд хоолойгоо саримс, царван, нимбэгний уусмалаар зайлаарай

Хүйтний эрч чангарахын хэрээр томуугийн тархалт сүүлийн өдрүүдэд ихсэх хандлагатай болжээ. Дүүргүүдийн эмнэлэгт томуугаар өвчилсөн бага насны хүүхэд олноор хэвтэх болсноор орны ачаалал ихэссэн байна.

Томуу, томуу төст өвчин өнөөдөр өнгөрсөн оны мөн үеийнхээс 1.2 дахин илүү байгаа бөгөөд энэ долоо хоногт өвчлөл эрс нэмэгдсэн байна. Томуугийн халдвар 0-15 насныханд халуурах, хатгаа болон хүндрэх шинж тэмдэг түгээмэл байгаа тухай мэргэжлийн хүн анхааруулав.

Иймд бага насны хүүхдээ томуугийн халдвараас сэргийлэхийн тулд гэрийн нөхцөлд ямар арга хэмжээ авч болох талаар Эрүүл мэндийн яамны газрын дарга Д.Нарангэрэл зөвлөлөө.

• Хүйтэн, сэрүүний улирал эхэлж байгаатай холбоотой хувцсаа тохируулан өмсөж, даарч, хөрөхгүй байх
• Гэр, сургууль, цэцэрлэг, ажлын байрны өрөө тасалгаанд цаг тутамд 10-15 минут цэвэр агаар оруулж, өдөрт 2-оос доошгүй удаа чийгтэй цэвэрлэгээ хийх.
• Биеийн дархлааг сайн байлгахын тулд халуун аарц, чацаргана, аньс, зөгийн балтай ус ууж, илчлэг сайтай, амин дэмээр баялаг хоол хүнс хэрэглэх.
• Гараа тогтмол савандаж угаах.
• Хүүхдийг цэвэр агаарт салхилуулах, хамрын хөндийг байнга цэвэрлэж байх.
• 0-5 насны хүүхдэд томуу, томуу төст өвчнөөс сэргийлэх цэгчилсэн иллэг хийж хэвших.
• Үзвэр, үйлчилгээ, олон нийтийн газраар сэлгүүцэхгүй байх
• Ханиад хүрсэн анхны шинж тэмдэг илэрвэл хүндрүүлэх болон цэцэрлэгт явуулж бусдад халдвар дамжуулахаас сэргийлж гэртээ байлган эмчил. Өрхийн эмнэлэгтээ ханд.
• Бага насны хүүхдийн хоолойг саримс, царван, лемоны уусмалаар долоо долоо хоногоор ээлжлэн зайлуулах.
• Ханиах, найтаах үедээ ам, хамраа нусны алчуур, сальфеткаар таглах, цэр нус, шүлсээ ил задгай хаяхгүй байх, амны хаалт зүүх.
• Томуугийн эсрэг вакциныг ХӨСҮТ-ийн сайн дурын дархлаажуулалтын кабинет (101 тоот өрөө), 21 аймгийн Эрүүл мэндийн газрын дархлаажуулалтын кабинетэд хандан тариулах боломжтой.