Энэ жил сайжруулсан зуух 5000 орчмыг тараана

Намрын налгар өдрүүд ард хоцор өвлийн түрүүч айсуй. Жил бүрийн өвөл асуудал болон яригддаг нөгөө утааны цаг үе ирж байна. Засгийн газраас агаарын бохирдлыг бууруулахаар "Цэвэр агаар сан"-г байгуулж иргэдэд сайжруулсан зуух тараагаад гурав дахь өвөлтэйгөө золгох гэж байна. 
 
Цаг уур, орчны шинжилгээний газраас  Улаанбаатар хотын агаарын чанарыг гэр хороолол, авто зам, орон сууцны хороолол, үйлдвэрийн дүүрэг орчимд автомат болон автомат бус багажаар 2-5 төрлийн үндсэн бохирдуулах бодисыг тодорхойлон хянаж байна. Агаарын бохирдлын хэмжээнд хийсэн уг судалгаагаар 2013- 2014 оны хүйтний улиралд агаар бохирдуулагч бодисын сарын дундаж агууламжийг өмнөх оны мөн үетэй харьцуулахад хүхэрлэг хий 20, нарийн ширхэглэгт тоосонцор 21, азотын давхар исэл 26 хувиар тус тус багассан дүн гарсан байна. Үүнээс үзэхэд агаарын бохирдол тодорхой хувиар буурсан байна.
 
Тэгвэл энэ жил Цэвэр агаар сангаас нийслэлийн гэр хорооллын айл өрхүүдэд нэмж 5000 орчим сайжруулсан зуухыг олгохоор төлөвлөгдөж байгаа аж. Гэхдээ тус сангаас олгодог татаасын хэмжээ буурч иргэдийн төлөх мөнгө нь нэмэгдэх юм байна. Ер нь гэр хорооллын иргэдийг сайжруулсан зуухаар хангах төсөл, хөтөлбөр үүгээр дуусгавар болж байгаа ажээ.