“Алтан донор” Д.Эрдэнэчулуун 153 удаа цусаа бэлэглэжээ

Цус сэлбэлт судлалын үндэсний төв 2015 оны 4 дүгээр сараас эхлэн сар бүрийн 03-ны өдрийг “Цусаа бэлэглэх өдөр” болгон төрийн болон төрийн бус байгууллага, аж ахуйн нэгжүүдтэй хамтран зохион байгуулж ирсэн. Энэхүү өдрийнхөө хүрээнд санаачилга гаргаж цусны донорын эгнээг өргөжүүлэх, тэднийг алдаршуулах зорилгоор жил бүрийн нэгдүгээр сарын 03-ны өдрийг  “Цусны донорын өдөр” болгож буйгаа зарлалаа.  Жил бүрийн  зургаадугаар сарын 14-нд “Цусны донорын дэлхийн өдөр” тохиодог бол манай улсын хувьд анх удаа ийм өдөртэй болж байгаа юм.

Энэхүү өдрийн хүрээнд тогтмол хугацаанд цусаа бэлэглэж байгаа 70-аас дээш өгөлттэй гурван донорыг “Хүрэл донор”, 100-гаас дээш өгөлттэй нэг донорыг “ Мөнгөн донор”, 150-иас дээш өгөлттэй нэг донорыг  “Алтан донор”-оор тус, тус өргөмжилж алдаршуулав.

 “Алтан донор”-оор 153 удаа цус цусны бүрэлдэхүүн хэсгээ бэлэглэсэн “Хүндэт донор” Д.Эрдэнэчулуун өргөмжлөгдөв. Мөн 10 донор “Бахархал 10, 20” тэмдгийн эзэд болсон бол 60-аас дээш удаа цус, цусны бүрэлдэхүүн хэсгээ бэлэглэсэн 10 донор МУЗН-ийн  “Энэрэл алт”, “Нигүүлсэл мөнгө”, “Шилдэг залуу алтан медаль”- аар тус тус шагнагдлаа. Түүнчлэн МУЗН-ээс Б. Батбаяр, Г. Одончимэг, Б. Мөнгөнтуул нарын  доноруудад  таван ханатай өргөө цагаан гэр бэлэглэсэн юм.

Дашрамд дурдахад JCI байгууллагын Монгол дахь салбар ЦССҮТ-тэй 2009 оноос эхлэн найм дахь жилдээ сайн дурын авлагагүй цусны донорын эгнээг өргөжүүлэх, донор хадгалалтыг сайжруулах, донорын үйлсийг олон нийтэд сурталчилах, цусны доноруудыг алдаршуулах, урамшуулах чиглэлээр хамтран амжилттай ажиллаж ирсэн бөгөөд олон чухал төсөл, хөтөлбөрүүдийг хэрэгжүүлсэн юм. Энэхүү хамтын ажиллагааны хүрээнд ЦССҮТ-тэй  2017 онд дөрвөн чиглэлээр хамтран ажиллах санамж бичигт гарын үсэг зурж, цусны бэлэг тэмдэг болсон доргоны маскотыг танилцууллаа.