Монгол хүн удирдсан төслийн судалгааг ”Nature” сэтгүүлд хэвлүүлжээ

Монгол Улсын шинжлэх ухаан түүхэндээ анх удаа монгол хүн удирдсан төслийнхөө судалгааг “Nature” сэтгүүлд хэвлүүлжээ. Эрдэмтэд олон улсад нэр хүндтэй шинжлэх ухааны сэтгүүлд бүтээлийнхээ тухай хэвлүүлснээр судалгааных нь ажлын үр дүнг дэлхий хүлээн зөвшөөрдөг гэдэг. Тэгвэл Японы RIKEN Үндэсний шинжлэх ухааны хүрээлэнд дархлал судлаачаар ажилладаг, анагаах ухааны доктор Д.Нямбаяр “Nature” сэтгүүлд нээлтийн нэгдүгээр зохиогч буюу эрдэм шинжилгээний төслийн гол удирдагчийн нэрээр бүтээлээ хэвлүүлсэн байна. Түүний хийсэн нээлт нь дархлааны эсийн ялгарал, хөгжлийн онолыг сууриар нь өөрчлөн, шинэ түвшинд гаргаснаар, харшил үрэвсэл, дархлааны тогтолцооны элдэв эмгэг, хорт хавдрыг дархлааны эсээр эмчлэх аргад дэвшил гаргахад түлхэц болох магадлалтай юм байна. Энэхүү судалгааг Д.Нямбаяр 10 жилийн туршид хийн дуусгажээ.

2017-02 сар. “Зиндаа” сэтгүүл №3 /503/