ЦССҮТ-ийн санхүүгийн үйлчилгээ стандартаас хол хаягджээ!

Цус сэлбэлт судлалын үндэсний төв /ЦССҮТ/ бол улсын хэмжээнд цус, цусан бүтээгдэхүүний үйлдвэрлэл, цус сэлбэлт судлалын төрөлжсөн мэргэжлийн тусламж үйлчилгээг үзүүлдэг цорын ганц байгууллага. Ингэхдээ дэвшилтэт технологи, инновацид тулгуурлан, үйлчлүүлэгчийн эрэлт хэрэгцээнд нийцүүлэн, тэгш хүртээмжтэй үйлчилгээ үзүүлж ажиллахыг эрхэмлэдэг гэжээ.

Цус судлалын төв үйлчилгээний төлбөрийг бэлэн мөнгөөр нэхэх нь ямар учиртай вэ?

Тус төв цус, сийвэн цуглуулж, цус цусан бүтээгдэхүүнийг эмнэлгийн захиалгын дагуу үйлдвэрлэх, хадгалах, цуглуулсан цусны нэгж бүрд цус сэлбэлтээр дамжих халдвар илрүүлэх, цусны бүлэг тодорхойлох, цус, цусан бүтээгдэхүүний чанарын хяналтын болон иммуногематологийн лавлагаа шинжилгээг хийх гээд олон арван үйлчилгээ үзүүлдэг. Иргэдийн хувьд цусны нарийвчилсан шинжилгээний үйчилгээг түлхүү авдаг байна. Эдгээрийн ханш нь 5000 төгрөгнөөс эхэлдэг. Цусан дахь эерэг, сөрөг биетийн шинжилгээ гэхэд 30 мянган төгрөг. “Хасах” болон ховор төрлийн цустай хэдэн зуун хүн үйлчилгээ авдаг. Гэтэл энэ төвд бэлэн мөнгөний ATM болон пост машины үйлчилгээ өнөөдрийг хүртэл алга. Жилийн өмнө байхгүй л байсан. Одоо ч мөн алга л байна. Орчин үеийн санхүүгийн тогтолцооны хөгжлийг дагасан ч, үйлчилгээний шуурхай, соёлтой байдлыг бодсон ч ийм төрлийн үйлчилгээ зайлшгүй хэрэгтэйг очсон хүн бүр уг нь хэлдэг.

Өнгөрсөн хугацаанд улс болон олон улсын хандивлагч байгууллагаас 3.3 тэрбум төгрөгөөр тус төвийн шинэ барилгыг ашиглалтад оруулж, эмнэлгийн болон эмнэлгийн бус тоног төхөөрөмж, мэдээллийн технологийн иж бүрэн шинэчлэлийг 100 хувь сайжруулж, цус цусан бүтээгдэхүүний аюулгүй байдал, хүртээмжийг нэмэгдүүлэх, донор үйлчлүүлэгчдийн тав тухтай орчныг бүрдүүлэхэд чиглэсэн олон төсөл хөтөлбөр, үйл ажиллагааг хэрэгжүүлж, шинэчлэл, дэвшлийн он жилүүд хөвөрсөөр ирсэн. Харин иргэдэд үзүүлж буй санхүүгийн үйлчилгээ нь өнөө л бахь байдгаараа орхигджээ. Эсвэл өөр эрх ашиг байдаг юм уу? Ямартай ч үйлчлүүлэгч төлбөрөө төлөх гэхээр карт уншигч пост байдаггүй бас НӨАТ-ын баримт өгдөггүй юм билээ.

Иргэн бүр биедээ тодорхой хэмжээний бэлэн мөнгөтэй явах боломж хомс. Дэлхийн хөгжил цаасан мөнгөнөөс татгалзаж байхад төрийн байгууллага гэхээрээ хөгжил дэвшлээс хоцордог, үйлчлүүлэгчдээ боддоггүй, хөшүүн хойрго байдаг хуучин ойлголтоо халах цаг болсон мэт. Энэ нь ердөө л дотоод зохион байгуулалттай холбоотой өчүүхэн зохицуулалтын л асуудал юм.

ЦССҮТ өнөөдөр эрүүл мэндийн салбараас олон улсын гурван стандартыг үйл ажиллагаандаа нэвтрүүлсэн анхны байгууллага гэж өргөмжлөгддөг. Тус төвийн нэгдсэн лаборатори нь MNS ISO 15189:2008, MNS ISO 15189:2015-аар давхар итгэмжлэгдээд байгаа. 2017 онд төвийн бүх үйл ажиллагааг хамруулан цогц байдлаар Чанарын менежментийн тогтолцооны MNS ISO 9001:2016-аар баталгаажуулсан байна. Мөн ХАБЭА-н удирдлагын тогтолцооны MNS OHSAS 18001:2012 стандартыг мөрдөн ажилладаг. Харамсалтай нь, иргэдэд үзүүлж буй санхүүгийн үйлчилгээ нь олон улсын стандартаас хол хаягджээ.

ЦССҮТ-ийн хамт олон эрхэм зорилгоороо “Чадварлаг баг, дэвшилтэд технологи, инновацид тулгуурлан, үйлчлүүлэгчийн эрэлт хэрэгцээнд нийсэн тусламж, үйлчилгээг үзүүлэхэд оршино” гэж тодорхойлжээ. Та бүхэн орчин цагийн санхүүгийн хөгжлийг ашиглан үйлчлүүлэгчдээ олон төрлийн эх үүсвэрээс төлбөр тооцоо хийх боломжийг олгож ажиллавал алсын хараандаа тусгасан цус сэлбэлт судлалын чиглэлээр Азидаа тэргүүлэгч орнуудын жишигт хүрэх боломж байна.

Хэрэв хүсвэл карт уншигч пост машиныг амархан авчихаж болдгийг сануулъя. Жижиг мухлаг, буфед, кофе шопуудаас эхлээд сарын 3 сая төгрөгийн гүйлгээ хийдэг дурын газар иргэдэд чиглэсэн санхүүгийн хялбар үйлчилгээ үзүүлдэг болсон цаг шүү.

М.Бүүвэй

www.zindaa.mn