Д.Сарангэрэл: Япон улсаас коронавирусийн туршилтын оношлуур авна

Засгийн газрын өнөөдрийн /2020.01.26/ ээлжит бус хуралдаан дууслаа. Коронавирусийн халдвараас сэргийлэх, урьдчилан сэргийлэх тухайд үргэлжлүүлэн авах зарим арга хэмжээний талаар Шадар сайд Ө.Энхтүвшин болон бусад холбогдох албаныхан мэдээлэл хийлээ. Шинэчлэгдсэн үнэлгээгээр Монгол Улсыг ӨНДӨР ЭРСДЭЛТЭЙ гэж үзсэнийг Шадар сайд онцлон анхаарууллаа.

Эрүүл мэндийн сайд Д.Сарангэрэл “Нийт 19 оронд коронавирусийн халдвар бүртгэгдээд байна. Монгол Улс гурав дахь удаагаа эрсдэлийн үнэлгээ хийхэд, өндөр эрсдэлтэй гэж гарсан учраас урьдчилан сэргийлэхийн тулд олон нийтийн хөдөлгөөн, сургууль цэцэрлэгийн үйл ажиллагааг хязгаарлаж байна. Бид өндөржүүлсэн бэлэн байдалд ажиллах ёстой. Элдэв худал мэдээлэл, тарааж ард түмнээ битгий төөрөгдүүлээч гэж нийт иргэдээсээ хүсэж байна. Эрүүл мэндийн яамнаас өгч буй мэдээ, мэдээллийг үзэхийг уриалж байна. 

Манай улсын Халдварт өвчин судлалын үндэсний төв /ХӨСҮТ/ дэлхийн 120 орны лабораторийн сүлжээнд ордог, олон улсын түвшинд хүлээн зөвшөөрөгдсөн лабораторитой. 21 төрлийн вирусийг илрүүлэх чадвартай. Монгол Улсад коронавирусийн халдвар бүртгэгдээгүй ч гэсэн ХӨСҮТ-д 50 ор бэлдсэн бөгөөд халдвар илэрсэн тохиолдолд нэмж гаргах 150 орыг нөөцлөөд байна. Манай улсын тэргүүлэх зэргийн эмч, мэргэжилтнүүдээс бүрдсэн баг ажиллаж байна. Ирэх долоо хоногийн мягмар гаригаас эхлэн Япон улсаас шинэ коронавирусийг оношлох оношлуурыг авна. Бид мэдээлэл технологийн газартай хамтран ажиллаж байна. Үүрэн телефоны оператораар дамжуулан сэрэмжлүүлэг хүргэж байна” гэв.

ЗАСГИЙН ГАЗРЫН ХУРАЛДААНААС ГАРГАСАН ШИЙДВЭРҮҮД
 

• Шинэ төрлийн коронавирусын эрсдэлээс урьдчилан сэргийлэх хүрээнд эрүүл мэндийн тусламж үйлчилгээний бэлэн байдлын хангах, эм, эмнэлгийн хэрэгсэл, тоног төхөөрөмж, хувийн хамгаалах хэрэгсэл, оношлуур, ариутгал, халдваргүйтлийн бодис худалдан авах, эмч, эмнэлгийн мэргэжилтний илүү цагийн хөлс, унаа машинд шаардагдах 9.7 тэрбум төгрөгийг Засгийн газрын нөөц санаас гаргахыг Сангийн сайд Ч.Хүрэлбаатарт даалгалаа. 
   
• Тогтоолын хавсралтад заасан хөрөнгөөр шаардагдах эм, тоног төхөөрөмж, бараа материалыг яаралтай шууд гэрээгээр худалдан авах, тараах ажлыг зохион байгуулахыг Эрүүл мэндийн сайд Д.Сарангэрэлд даалгахаар хэлэлцэж байна.
   
• БНХАУ-тай хиллэдэг боомтуудаар тээврийн хэрэгслээр болон явган зорчиход хязгаарлалт хийж, дэглэмийг өндөржүүлэх ажлыг 2020 оны нэгдүгээр сарын 31-ний дотор шийдвэрлэхийг Гадаад харилцааны сайд Д.Цогтбаатар, ХХЕГ-ын дарга Ж.Бямбасүрэнд даалгалаа. Иргэдийн хөдөлгөөнд хязгаарлалт хийхдээ явганаар болон автомашинаар зорчихыг хамруулж байгаа аж.
   
• Боловсролын сургалтын байгууллагын хичээлийг гуравдугаар сарын 2-ныг хүртэл зогсоосонтой холбоотойгоор ЕБС-иуд, их дээд сургуулиуд, МСҮТ, цэцэрлэг, "Найрамдал" зуслангийн сургалтын үйл ажиллагааг нийтэд нь хамруулж, 2020.03.02 хүртэл сургалтын үйл ажиллагааг хаалаа.
   
• Спортын тэмцээн, уралдаан зохион байгуулахыг хориглов.
   
• Цахим болон теле хичээл зохион байгуулах арга хэмжээ авах салбарын сайд нарт даалгав.