Б.Бадамцэцэг: Би эцсээ хүртэл охиныхоо төлөө тэмцэнэ

Сүүлийн үед хүүхдийн өвчлөлийн асуудлаар дуу хоолойгоо хүргэж буй иргэн Б.Бадамцэцэг БНСУ руу охиноо эмчлүүлэхээр явах боломжтой болжээ. Тэрбээр өмнө нь нэг талын сүүжний ясаа хавирганаас нөхүүлэх хагалгаанд орж, байсан ба хагалгаанаас хойш хэдэн жилийн дараа охиноо өлгийдөн авсан ч харамсалтай нь Б.Цэрэнлхам охин нь хүнд өвчтэй болсон тул хандив цуглуулж, БНСУ-д оношлуулан, эмчлүүлэхээр зорих гэж байгаа юм. Б.Бадамцэцэг хөгжлийн бэрхшээлтэй болж, нэг хөл нь нөгөөгөөсөө 8 см богино болсон зэрэг шалтгаанаас үүдэн хүүхдээ тэвэрч явах боломжгүй болсон аж. Ингээд нөхрөө дагуулж явах шаардлагатай байгаа ч түүний нөхрийг БНСУ-д хууль бусаар ажил эрхэлсэн, нийгмийн даатгал төлдөггүй байсан гэх шалтгаанаар виз гаргаагүй байна. Б.Бадамцэцэгтэй холбогдож, цөөн хором ярилцлаа.

-Таны нөхрийн виз гарахгүй байгаа тул өлсгөлөн зарлана гэж хэвлэлийн хурал хийлээ. Хөгжлийн бэрхшээлтэй ээж өлсгөлөн зарлана гэхээр сэтгэл их эмзэглэж байна. Визний асуудал нааштай шийдэгдэж байна уу. Төрийн өндөр албан тушаалтнуудтай уулзав уу?

-Би Гадаад харилцааны яамны Төрийн нарийн бичгийн дарга Н.Анхбаяр болон Хөдөлмөр, нийгмийн хамгааллын сайд А.Ариунзаяа нартай уулзсан. БНСУ-аас Монгол Улсад суугаа Элчин сайдтай биечлэн уулзаж, асуудлыг нааштай шийдвэрлүүлэх талаас нь ярина гэсэн.

-Ирэх даваа гарагийн нислэгийн тийз авсан гэж сонссон. Нислэгээс өмнө асуудал шийдэгдэх болов уу?

-Бид ирэх даваа гарагт нисэх байсан ч нөхрийн маань виз гарахгүй байгаа тул билетээ цуцалсан. Эгч нь сүүжний асуудалтай тул хүүхдээ өргөж чаддаггүй. Түрээд явна гэхээр манай хүүхэд байнга хүчил төрөгчийн аппарат залгадаг. Тиймээс заавал аавынх нь тусламж хэрэгтэй болж таараад байна. 

-Танай хүнд ямар учраас виз гаргахаас татгалзаад байгаа юм бэ?

-Манай хүнд ямар ч асуудал байхгүй. Хувийн компани манай хүний нийгмийн даатгалыг төлөөгүй юм. Монгол Улсад хүний төлөө ямар ч хууль, дүрэм алга. Би хуулийн мэдлэгтэй учраас хуулиа бариад, орилоод байгаа болохоор миний асуудал яах вэ болж байна. Гэтэл хүлцэнгүй хүмүүс бол төрийн байгууллагын шат дамжлага хүнд суртлын өмнө сөхөрч байна.

-Та төрөхөөс өмнө шинжилгээнд хамрагдаж байсан уу?

-Би сүүжний хагалгаанд орсноослл хойш хүүхэдтэй болохын тулд шаардлагатай бүх шинжилгээг өгсөн. Жирэмсэн болоод гурав дахь шинжилгээг ч өгсөн. Гэтэл охиныг минь төрсний дараа Жи-80 гэдэг онош тодорсон. Энэ онош бол ерөнхий онош юм. Иргэн Б.Бадамцэцэг юунаас үүдэж ийм хүүхэд гаргасан бэ гэдгээ маш зөв оношлуулмаар байна. Би охиноо хоёр сартай байхаас нь хойш оношлуулахаар зүтгэсэн. Өнөөдөр оношлуулах асуудлаа шийдэх гэхээр нөхрийн минь виз гарахгүй байна.

-Таны охины биеийн хөгжил үеийнхэнтэйгээ харьцуулбал ямар байна вэ?

-Есөн сартай зарим хүүхдийн шүд нь ургаагүй. Гэтэл миний охины шүд ургасан. Биеийн хөгжил бол хэвийн. Гэтэл эмч нар гаднаас нь хараад л аутизм, даун гээд онош тавьчихдаг. Одоо охин маань Эх, хүүхдийн эрүүл мэндийн үндэсний төвийн Сэхээн амьдруулах тасагт байгаа. Бид Өмнөд Солонгос явах хүртэл охиноо өөр дээрээ ч авахгүй байхаар шийдсэн. Тасгаас гараад халдвар авбал яах вэ. Гадаадын эмнэлгүүд өвчтэй хүүхдээ тэврээд ирсэн ээжид урам өгдөг. “Чи мундаг шүү. Хүүхдээ эрүүл болгохын төлөө энэ бүхнийг туулж, зорьж ирсэн” гэж урам өгдөг. Гэтэл манайхан одоо хэцүү болсон байна, яана даа та хоёрыг гэдэг үг хэлж, ээжүүдийн сэтгэл зүйг унагаадаг. Одоо Эх, нялхсын сэхээний гадаа гурван ээж байна. Хүүхэд нь хоёр, гурван сар сэхээнд байгаа. Ээж нь “Манай хүүхэд найдваргүй” гээд сууж байна. Би тэдэнд ээж хүн хүчтэй байх ёстой, хүүхдээ амьдруулахын тулд тэмцэх ёстой гэж хэлдэг. Би эх хүн баймаар байна. Би эцсийг нь хүртэл эх хүнийхээ үүргийг биелүүлж, хүүхдийнхээ төлөө тэмцмээр байна.