ОЛОН ӨНГӨ: Сурагчдын дүрэмт хувцсыг энгийн болгоё

Үнийн өсөлтөд дарлуулсан иргэд үр хүүхдийнхээ хувцсыг худалдан авахад хүртэл хүндрэлтэй байгаагаа учирлаж байна. Хичээл сургууль эхлэх гэж буй энэ цаг үед дунд сургуулийн хүүхдүүдийн формын асуудал хурцаар яригдаж байна.

Өнөө жил дотоодын үйлдвэрийн форм тэнгэрт тулсан үнэтэй байгаа гэнэ. Өмнө жил зарагдаж байсан үнээсээ даруй хоёр дахин нэмэгдсэн юм байх. Олон хүүхэдтэй айлд бол овоо л үнийн дарамт үүсэж байгаа бололтой. Нэгэнт иргэдийн цалин хаанаа ч хүрэлцэхгүй байгаа энэ цаг үед сургуулиуд “Тийм, ийм үйлдвэрийн дүрэмт хувцас өмс” гэж сурагчдаа шахахаа больчихвол зүгээр санагдана.

Цагаан цамц, хар өмдөөр ижилсээд л болоо юм биш үү. Заавал пиджак, сарфан, майк энэ тэр гэж байхаар адил өнгийн хувцсаар, амьсгалдаг, зөөлөн материалтай, 30-40 мянган төгрөгийн үнэтэй цамцаар жигдэрчихвэл яасан юм. Ер нь ч тэгээд  дүрэмт хувцасны зах зээлд манай дотоодын хэдэн үйлдвэрүүд ноёрхдог. Тэдний хувьд энэ жил хил, гаалийн асуудлаас болоод даавуу материалынх нь үнэ өссөн сурагтай.

Дээрээс нь зах зээлд монополь болсон болохоор хүссэн үнээ хэлээд сууж байдаг ч талтай. Өрхийн санхүү хүндхэн байгаа энэ үед сурагчдын дүрэмт хувцсыг ганц жил шаардахгүй байхад яавал гэж.  Мэдээж дүрэмт хувцас өмсөх нь сурагчдын дунд өмссөн  зүүсний ялгаварлал гарахгүй сайн талтай. Гэхдээ тэр бүхнийг хар өмд, цагаан цамц өмсөөд ижилсчихэд ялгаагүй л нөхчихөж болохоор санагдана. Ямартаа ч дүрэм хувцасны үнээс даруй гурав дахин хямд тусна даа. Иймээс эцэг, эхчүүд хүүхдүүдийн сургуулийн захиргаанд дээрх саналыг гаргавал дэмжиж юуны магад.

Эх сурвалж: Өглөөний сонин