Хэрүүлийн сэдэв хүүхдийн форм

Уг нь бол сурагчийн дүрэмт хувцас юм. Гэвч манайхан хүүхдийн форм хэмээн ярилцаж, ойлголцоод хэвшчихсэн.

Ер нь манайханд цаг үеийн онц гойд сэдэв л гараад ирэхгүй бол жилийн тойрогтоо тоотой хэдхэн “Хэрүүлийн алим” байдаг юм. Замын түгжрэл, утаа, шатахууны үнэ нэмэгдэх, тэгээд сурагчийн дүрэмт хувцасны асуудал. Бөөсөрдөг, дотоодынх үнэтэй байна, дүрэмт хувцасыг болиулах хэрэгтэй зэргээр хүн бүр эрхээ эдэлж, дуу хоолойгоо нийгмийн сүлжээгээр тарааж байна.

Өмнөх жилүүдээ бодоход энэ хэрүүл харьцангуй их байх шиг. Гэтэл дунд сургуулийн дүрэмт хувцас бол ялгаварлан гадуурхалтаас сэргийлэх, хамгаалах хамгийн чухал зүйл. Баян, ядуугийн зааг өдрөөс өдөрт алсарч байгаа энэ цаг үед бүр ч их хэрэгтэй.

Харамсалтай нь нутгийн ой, хурим найр, аялал зугаалгадаа гар татаагүй байж бүтэн жил, өдөр бүр өмсөх дүрэмт хувцасанд голоо цохиж байгаа мэт аашлах нөхөд их байна. Тэгсэн ч тэдний ихэнх нь эцэг, эхчүүд бус, эсхүл хүүхэд нь дунд сургуульд ороогүй байх нь олонтаа.

Харин жинхэнэ эцэг, эхчүүд юу ч болж байсан, хүүхдэд нь ямар ч хэрэгцээ гарсан чимээгүйхэн асуудлыг шийдэж байдаг билээ. Тиймээс жил бүрийн “Хэрүүлийн алим”-наасаа сурагчийн дүрэмт хувцасны асуудлыг хасаад үүрэг хариуцлагаа чимээгүйхэн үүрдэг аав, ээжүүдэд нь асуудлыг даатгаад орхино уу даа, хэдүүлээ.  

Эх сурвалж: Өглөөний сонин