Сурагчид НЭГДҮГЭЭР УЛИРАЛД 12-р сарын дунд хүртэл хичээллэнэ

Боловсрол, шинжлэх ухааны яамнаас 2020 онд хичээлийн жилийн бүтцийн өөрчлөлт хийж, ерөнхий боловсролын сургуулиудыг гурван улиралтайгаар хичээллүүлэхээр болсон. Энэ хуваарийн дагуу харахад 2022-2023 оны хичээлийн жилийн нэгдүгээр улиралд сурагчид арванхоёрдугаар сарын дунд үе хүртэл хичээллэхээр байна. 

Тодруулбал, Энэ хичээлийн жилийн эхний улиралд ЕБС-иуд 16 долоо хоног буюу арванхоёрдугаар сарын 16-ныг хүртэл хичээллээд, амрах юм. 

2020 онд гаргасан хичээлийн жилийн бүтцийг үргэлжлүүлэн мөрдөх талаар БСШУС-аас дараах мэдэгдлийг гаргажээ: 

БСШУС-ын сайдын 2020 оны А/244 дүгээр тушаалаар хичээлийн жилийн бүтцэд өөрчлөлт оруулан баталж, тухайн бүтцийг өмчийн бүх хэлбэрийн ерөнхий боловсролын сургууль 2020-2021 оны хичээлийн жилээс мөрдөж байна.

“Өвөл хүйтний эрч чангарсан үед томуу, томуу төст өвчин ихээр дэлгэрдгээс карантин тогтоох, малчдын хүүхдүүд цаг агаарын хүндрэлтэй нөхцөлд ар гэртээ туслахаар явах зэргээс шалтгаалж хичээл тасалдах, хичээлийн жилийн төгсгөл буюу 6 дугаар сарын сүүлээр иргэд гэр бүлээрээ амарч заншсанаас сурагчдын ирц бүрдэхгүй байх” зэрэг асуудлыг эцэг эх, олон нийт, боловсролын салбарын багш, ажилтан сурагчдаас авсан хэд хэдэн удаагийн санал асуулгад хөндсөн тул хичээлийн жилийн бүтцийг Боловсролын хүрээлэн, БСШУС-ын яам хамтран боловсруулж, баталсан болно. Өөрөөр хэлбэл хичээлийн жилийн бүтцэд энэ жил гэнэт өөрчлөлт оруулсан зүйлгүй юм.

Нэгдүгээр улирлын 8 эсвэл 9 дэх долоо хоногт сургуулиуд хичээлийн агуулгаа тохируулж урлаг, соёл, спорт хүмүүжлийн зэрэг танхимын гадуурх сургалт зохион байгуулах замаар сурагчдын оюуны ачааллыг бууруулах арга хэмжээ авах боломжтой.