Л.Энх-Амгалан: "Орос III"-тай холбоотой асуудалд цэг тавьсан

БШУЯ-наас ЕБС-ийн багш нарын гүйцэтгэлийн үнэлгээний үр дүнгийн талаар мэдээлэл хүргэлээ. Энэ үеэр БШУ-ны сайд Л.Энх-Амгалан "Орос III" сургуулийн талаарх сэтгүүлчдийн асуултад дараах тайлбарыг өглөө. 

Тэрбээр "Орос гуравдугаар сургуультай холбоотой асуудалд цэг тавьсан. Ахиж энэ асуудал сөхөгдөх ёсгүй. Захирал асан Ж.Соронзон Монгол Улсын хууль тогтоомжийг биелүүлэх үүрэгтэй. Аль ч улсын элчин сайдын яам Монгол Улсын Засгийн газрын гаргасан шийдвэрийн эсрэг мэдэгдэл гаргах ёсгүй.

Өнөөдрийн байдлаар орос 3-р сургуулийн өмчлөл 100 хувь Монгол Улсын өмчлөлд байгаа. Тодруулбал нийслэл Улаанбаатар хотын өмч. ОХУ-аас нэг ч төгрөгийн зардал гаргадаггүй. Бидний гол зорилго бол сургуулийн үйл ажиллагааг тасралтгүй явуулах юм.

Энэ сургуулийн сургалтын үйл ажиллагааны урсгал зардлын 84 хувийг эцэг эх, асран хамгаалагчдын төлбөрөөс, 16 хувийг татвар төлөгчдийн мөнгө буюу хувьсах зардлаар өгч байгаа. Тийм учраас энэ сургуулийн удирдлагатай холбоотой асуудалд хувьсах зардалд нэг ч төгрөг гаргадаггүй, өмчийн хэлбэрт нэг ч төгрөг оруулаагүй байж Засгийн газрын гаргасан шийдвэрийн эсрэг ямар нэгэн гадаадын этгээд явуулга, байр сууриа илэрхийлэх ёсгүй гэдгийг хатуу хэлье" гэлээ.

Мөн энэ асуудлаар БШУ-ны дэд сайд Г.Ганбаяр "Боловсролын яамны үүдэнд очиж жагс, цугла" гээд цаасан дээр үг бичээд явуулчихсан байгаа юм. Өнгөрсөн амралтын өдрүүдэд ОХУ-ын 154 багштай уулзсан. Бэлдсэн гурван хуудас бичиг уншаад , гараад явсан. Цаашдаа хууль үйлчилж, шийдвэр хэрэгжинэ. 

Энэ сургуулийн гэрээг 1992 онд байгуулах үедээ хоёр улсын засгийн газрын хоорондын гэрээгээр томилгоотой холбоотой асуудлыг Монгол Улс бүрэн шийдвэрлэнэ гэсэн тодорхой гэрээний заалт байгаа. Энэ гэрээ өнөөдөр хүчин төгөлдөр байгаа.

Хоёрдугаарт, ОХУ-ын Гэгээрлийн яамны ажлын хэсэг өнгөрсөн найман сард ирээд энэ сургууль дээр ажиллаад эхнийхээ тодорхой асуудлуудыг тавьчхаад явсан.  Эцэг, эхчүүдээс төлбөр авч байгаа нь ямар хууль дүрмээр зохицуулж байгаа нь ч тодорхойгүй" гэлээ.