УИХ-ын хаврын чуулган өнөөдөр завсарлана

УИХ-ын дарга Д.Дэмбэрэлтэй МАН-ын дарга С.Батболд, Ардчилсан намын дарга Н.Алтанхуяг нар өчигдөр уулзлаа. Сонгуулийн хуулийн зөвшилцлийн ажлын хэсгийн явц байдал, байнгын хороодын үйл ажиллагаа зэргийн талаар санал солилцож хаврын чуулганыг өнөөдөр завсарлуулах боломжийн талаар ярилцжээ. Намрын чуулганаар хэлэлцэх асуудлын дараалал, төсвийн хүрээний мэдэгдэл, үндсэн чиглэл зэргийг өнөөдөр байнгын хороод, чуулганы нэгдсэн хуралдаанаар хэлэлцэх боломж ямар байгаа талаар тэд ярилцсан байна. Шахаж ажиллавал маргааш чуулганыг өндөрлүүлж болно гэж талууд үзэж байгаа аж. Тиймээс УИХ-ын хаврын ээлжит чуулганы үйл ажиллагааг өндөрлүүлэхээр төлөвлөж Тамгын газрынхан бэлтгэл ажилдаа орж байна. Юуны өмнө УИХ-ын даргын зөвлөхүүд Д.Дэмбэрэл даргын чуулганы хаалт дээр хэлэх үгийн эхийг бэлтгэх ажилд оржээ. Харин УИХ-ын Сонгуулийн тухай хууль энэ хаврын чуулганаар батлагдаж амжихгүй нь ойлгомжтой боллоо.

Эх сурвалж: Монголын мэдээ сонин