Москва дахь манай төлөөлөгчийн газарт Чеченүүд казино ажиллуулдаг юм биш биз!

Москва дахь Монгол Улсын ЭСЯ-ны байрыг зарчихжээ гэх мэдээлэл улстөрийн хүрээнээс анх гарч чамгүй шуугиан тарьсан. Улмаар УИХ-ын Аюулгүй байдал, гадаад бодлогын байнгын хорооны дарга Ц.Цолмонгоор ахлуулсан ажлын хэсэг Москвад саатах зуураа Элчингийн байр савны асуудлыг нягталсны дараа асуудал үүсгээд байгаа обьект нь Москва дахь манай улсын Худалдааны төлөөлөгчийн газар гэдэг нь тодорхой болсон.  Ц.Цолмон эрхмээс тэр талаар нь тодруулахад бүх зүйл OK байна лээ гэх агуулгатай хариулт өгсөн ч, тэрхүү байрыг тойрсон асуудлаар эрхмүүд янз бүрийн байр суурьтай байгаа юм. Тухайлбал, МУНН-ын Ерөнхий нарийн бичгийн дарга Б.Батболд энэ талаар “ОХУ-д казиног тусгай заагдсан бүсэд ажиллаж болохоор хуульчилсан хэдий ч зарим нэг улсын элчин сайдын яамнууд байраа түрээслэн казино ажиллуулдаг болсон байх юм... Хуучин манай Москва хотод байдаг худалдааны төлөөлөгчийн байрыг Чеченүүдэд олон жилээр түрээслүүлсэн ба Монголчууд Москвад очоод хямд буух буудалтай байсан нь байхгүй болсон гэж дуулсан юм байна энэ тухай мэдээлэлтэй хүн байна уу” хэмээн бичжээ.

 Гэтэл үзэж хараад хянаж шалгаад ирсэн гэж ойлгогдоод байгаа  Ц.Цолмон гишүүний хувьд байр сууриа илэрхийлэхдээ  “-ЭСЯ-ны хоёрдугаар байр буюу хуучин Худалдааны төлөөлөгчийн газар байрлаж байсан байр нь А, Б гэсэн хоёр хэсэгтэй. Хуучин А хэсгийг түрээслэсэн компани нь Б хэсгийг засч янзлаад цаашид түрээслэх тухай яригдаж байгаа. Тиймээс бид ЭСЯ-нд байгаа холбогдох бичиг баримттай нь танилцсан. Мөн ГХЯ-наас ч энэ талаар тодорхой тооцоо хийх, судлах ажлын хэсэг гарсан юм билээ. Тэд энэ ажлаа  ойрын хугацаанд хийнэ. УИХ-ын ажлын хэсэг газар дээр нь очиж, танилцаад зохих дүгнэлтээ хийсэн. Хэвлэл мэдээллийн хэрэгслээр бичиж байгаа шиг Монголын ЭСЯ-ны объектыг худалдаж, өөр хүний эрх мэдэлд шилжүүлсэн зүйл байхгүй...  Социализмын үед манай ЭСЯ-нд олон хүн ажилладаг байсан. Сүүлийн үед орон тоо цомхотгосонтой холбоотой хоёрдугаар байр сул байгаа. Тиймээс 10 гаруй жилийн өмнөөс энэ байраа аж ахуйн нэгж, байгууллагуудад түрээслэсэн. Түрээсийнхээ төлбөрөөр Элчин сайдын яамны үйл ажиллагааг санхүүжүүлдэг.” гэх мэдээллийг өгсөн байгаа. Гэсэн ч “ЭСЯ-ны хоёрдугаар байр буюу хуучин Худалдааны төлөөлөгчийн газрын байртай  холбоотой асуудал дуусахгүй нь.

Уг нь Москва хот дахь  Монгол Улсын Элчин сайдын яамны байр нь  Элчин сайдын яамны төв байр, Элчин сайдын яамны II байр буюу Худалдааны төлөөлөгчийн газар, Дипломатуудын орон сууц, Элчин сайдын яамны  зуслангийн газар гэх дөрвөн хэсэг объект байдаг юм байна.

Элчин сайд Д.Идэвхтэнгийн хэлж буйгаар бол анхнаасаа энэ байр зарагдаагүй, түрээслэгдсэн гэдгийг хэлж байгаа. Тэрээр “Элчин сайдын яамны мэдлийн байр зарагдаагүй, түрээслэгдсэн байгаа. Барилгыг зарах ямар ч боломж байхгүй. Монгол Улсын Засгийн газрын өмч, ОХУ-д бүртгэлтэй, өмчлөлийн гэрчилгээ, бүх бичиг баримт нь бий. 1960-аад оны дунд үед баригдсан барилгад бараг 50 жил ямар ч засвар хийгээгүй. Мөнгө хөрөнгө олдохгүйн гачлан их байлаа шүү дээ.” Хэмээн ярьсан байгаа.

Тэгэхээр талууд Элчингийн байрыг зарж үрээгүй түрээслэсэн гэдгийг зөвтгөх талаас ийм маягаар ярьдаг бөгөөд харин чухам хэнд түрээслэчихэв гэдэг дээр угаас асуудалтай. Монголын Худалдааны төлөөлөгчийн газар гэх тодотгол дор явж ирсэн байрыг 2006 оны хоёрдугаар сарын 1-нд анх түрээслүүлсэн гэх мэдээлэл манайд ирж байсан гэх мэдээлэл бий. Тэр үед Монгол Улсаас ОХУ-д сууж байсан Элчин сайд Л.Хангай энэ шийдвэрийг гаргасан гэх. Мөн өөр нэг мэдээлэл бий. Тэр нь ОХУ-ын “Центр-Регион эстэйт” гэх компани 2008 онд Москва дахь манай улсын Худалдааны төлөөлөгчийн газрын 8 давхар барилгыг өөрсдийнхөө зардлаар засварлаж өгснийхөө хариуд 10 жилийн хугацаатай түрээслэх гэрээ байгуулан, засварын зардлыг түрээсийн үнээс суутгахаар тохиролцсон гэх мэдээллийг Элчин сайд өгсөн байгаа. Тэгэхээр 2006-2008 оны хооронд өөр газарт түрээслүүлж байгаад 2008 оноос хойш  “Центр-Регион эстэйт” компанид түрээслүүлээд байгаа юм уу гэсэн эргэлзээ дагуулсан мэдээллүүд бидэнд байгаа юм. Түүнчлэн Москва дахь манай ЭСЯ-ны байранд Чеченүүд казино ажиллуулдаг байхыг ч үнэхээр үгүйсгэх аргагүй тодорхой бус мэдээллүүд байна.

Б.Итгэлт