“Хурд”-ын Ц.Ганбаяр: Өвөө болсон ч дээл өмсөхгүй гэж мэдэх л хүн дээ

Тус хамтлагийн ахлагч Ц.Ганбаяр шулуун үг, шударга зангаараа нэг хэсэг олныг гайхуулж байсан гэхэд хилсдэхгүй. Хамтлагт нь байсан хөгжимчин П.Нарсар дуучин Т.Баясгаланг дагаж, нийтийн дуу дуулахаар одсонд ихэд эгдүүцэж “Тэр хүүхэд ямар байснаа мартсан бололтой. Ажил, амьдралынх нь байр суурийг бид л тавьж өгсөн” хэмээн бухимдсан удаатай. Тэгвэл өдгөө мань эр “Би дээл өмсөх дургүй ээ. Ялангуяа зуны улиралд. Элдэв загварын дээл өмсөөд, халууцаж хөлөрсөн хүмүүс их онцгүй харагддаг шүү дээ. Надад дээл зохих ч юм уу, үгүй юм уу, бүү мэд.

Лав л  60 нас хүртлээ дээл өмсч, мөнгөн аралтай өргөн бүсээр гоёхгүй. Ач гучаа тойруулж суулгасан өвөө болчихоод дээл өмсөхгүй гэж мэдэх л хүн дээ, би. Харин одоо бол олон халаастай хүрэм, жийнсэн өмдөө ч солихгүй гэж бодож байна” гэлээ. Мэдээж хэрэг, рок попын ертөнцөд жинтэй хувь нэмэр оруулсан “Хурд” хамтлагийн ахлагч маань дээл өмсөх дургүй ч, үндсэрхэг үзлээ гээхгүй гэдэг нь тодорхой биз.

С.Цахиур