Тусгаарлалтад байсан жолооч нар нэгийнхээ аминд хүрчээ

Өмнөговь аймгийн Ханбогд сумын Хайрхан багийн Цагаан хад суурьшлын бүсэд энэ сарын 4-ний шөнө аймшигт хэрэг гарчээ. Эх сурвалжийн өгсөн мэдээллээр тус газар тусгаарлалтад байсан жолооч нар архидан согтуурсны улмаас нэгийнхээ аминд хүрсэн харамсалтай хэрэг гарсан гэнэ.

Энэ талаар Цагаанхаданд тусгаарлагдаж буй жолооч Я-аас зарим зүйлийг тодрууллаа.

-Хэргийн талаар товчхон ярихгүй юу?

-Нэг өрөөнд тусгаарлагдаж байсан залуусын дунд ийм харамсалтай хэрэг гарчихлаа. Уг нь тусгаарлалтад байна гэдэг бол гаднын хүнтэй харилцаанд орохгүй, гадагшаа гарахгүй байна гэсэн үг. Гэтэл хаанаас ямар тохиолдлоор гэдэг нь тодорхойгүй шалтгаанаар нэг өрөөнд тусгаарлалтад байсан жолооч нар архи авч уугаад учир битүүлгээр нэг залуугийн аминд хүрчихлээ. Халдвар хамгаалал, хорио цээрийн дэглэм тавьж, зохион байгуулж удирдаж байсан хүмүүс нь л энэ асуудал дээр хариуцлага хүлээх ёстой. Мэдээж тэр шөнө харуулд гарч байсан харуулаас илүүтэй тусгаарлалтыг гол зохион байгуулж байсан, ерөнхий зохион байгуулагч нарын хайнга байдлаас л ийм зүйл болсон. Одоо энэ асуудлаас болж Гашуунсухайт боомт дээр жолооч нарын дунд үймээн болж байна. Яагаад тусгаарлалтад байсан хүн гадагшаа гарав, архи уув. Яагаад тусгаарлалтад байсан хүн нэгнийхээ аминд хүрэв. Маш ноцтой асуудал биз дээ.

-Өрөөндөө хэдүүлээ хэд хоног тусгаарлагддаг юм бэ?

-Нэг өрөөнд угаасаа дөрвөн хүн тусгаарлагддаг юм. 14 хоног тусгаарлана гэчихээд одоогийн байдлаар 45 хоног тусгаарлагдсан хүн хүртэл байна. Мөн дээрээс нь энэ тусгаарлалтын байрыг бизнес гэж харах болсон. Нэг жолооч нэг хоноход тусгаарлалтын байранд 130 мянган төгрөг төлдөг. Нэг өрөөнд дөрвөн хүн орно. Тэгэхээр нэг хоногт нэг өрөөнөөс 520 мянган төгрөг орж байгаа юм. Энэ үнэдээ хоол нь багтдаг. Жолооч нар сүүлдээ бүр гайхаж байна. Үнэн ч юмуу, худлаа ч юмуу. Жолооч нараас шинжилгээ авах үед нэг жолоочоос нь  сул эерэг хариу илэрсэн гээд гарчихдаг. Тэгэхээр бүгдийнх нь тусгаарлалтын хугацааг дахиад 7-14 хоногоор сунгачихдаг. Тэр сул эерэг гэж гарсан хариугаа хот руу явуулж, шинжлүүлдэг юм байна. Хариу нь ирэх гэсээр байтал хоног хугацаа маш их ордог.Хотод очихоор нөгөө хүнийх нь хариу эрүүл гарчихсан ч удаа бий. Эцэст нь нөгөө жолооч нь гомдолтой хоцордог.  Иймэрхүү асуудлаас болж, жолооч нарын дунд бөөн бухимдал үүсч байна. Ажил төрлөө алдаж байна. Эцэст нь нэгнээ хүртэл хөнөөчихлөө. Бас нэг жишээ бол, тусгаарлалтын  үеэр ээж нь нас барсан жолоочийг ар гэр рүү нь явуулсангүй. Мэдээж хилийн бүс рүү орох гэж байгаа бол тусгаарлалтын хоногоо дуусгаад цаашаа нэвтрэх нь зөв. Гэтэл тэр жолооч буцаад хот руу ээжийнхээ буяны ажилд оролцохыг хүсэхэд  яагаад явуулж болохгүй гэж. Энэ мэтчилэн утгагүй асуудал их байна.

-Жолооч нар нэгийнхээ аминд хүрсэн энэ асуудал бол яалт ч үгүй тусгаарлалтын дэглэм ямар байгааг харуулж байна?

-Тусгаарлалтын горим бол алдагдсан. Үүнээс гадна энэ тусгаарлалт гэж хийгдэж байгаа асуудал өөрөө маш их утгагүй. Юу гэвэл, тусгаарлалтад байх хугацаандаа өвчин дотроосоо авчихдаг тохиолдол ч гарч байгаа. Уг нь эрүүл гэдгээ нотлоод цаашаагаа тээвэрт орох гээд байгаа шүү дээ. Гэтэл тусгаарлалтад дотроо өвчин аваад байгаа байхгүй юу.

-Яг тийм тохиолдол гарсан уу?

-Тэр асуудлаас болж сая Хятадын талаас хоёр долоо хоног  хил хааж, өнгөрсөн долоо хоногт нээлээ. Дотроо өвчлөл гараад байдаг. Энд байдал үнэхээр холион бантан болж байна. Холбогдох хүмүүст нь хариуцлага тооцмоор байна.

-Тусгаарлалтад байгаа жолооч нарын асуудлыг хариуцаж байгаа гол газар нь УОК уу?

-Н.Амарзаяа гэж Засгийн газрын бүрэн эрхт төлөөлөгч энд томилогдсон. Манай жолооч нар энэ хүнийг огцрохыг шаардаж байна гэв.

Харамсалтайгаар амиа алдсан талийгаачийн ар гэрийнхэнтэй холбогдоход “Энэ асуудалд үнэхээр их гомдолтой” байгаагаа илэрхийлсэн Тэд шаардлага гарвал хэвлэл мэдээлэлд хандах тухайгаа ч мэдэгдсэн юм.

Эх сурвалж: ӨГЛӨӨНИЙ СОНИН