МИАТ-ийн гүйцэтгэх захирал асан Ц.Орхоныг эхнэрийнх нь хамт гүтгэж байна гэв

Төрийн өмчит МИАТ компанийг мөнгө олох хэрэгсэл болгон ашигласан байх өндөр магадлалтай 10 гаруй эрхмийг шалгаж байгаа билээ. Тэгвэл өнөөдөр тэдний нэг болох МИАТ-ийн гүйцэтгэх захирал асан Ц.Орхоны хэргийн талаар өмгөөлөгч Ц.Монгол мэдээлэл хийв. Түүний хэлж буйгаа өмгөөлүүлэгч Ц.Орхон болоод бусад нөхдүүдэд холбогдох хэрэг Нийслэлийн Прокурорт шилжжээ.

Өмгөөлөгч Ц.Монгол хэлж буйгаар Ц.Орхоны талаар хэвлэлээр гараад байгаа мэдээллүүд гүтгэлгийн чанартай гэнэ. Ц.Орхон болон түүний эхнэр Ү.Цэцэгмаа нарыг Эрүүгийн хуулийн 150.3 буюу байгууллагын эд хөрөнгийг итгэмжлэгдсэн этгээд завшиж үрэгдүүлсэн, онц их хэмжээний хохирол учруулсан, 166.1 буюу мөнгө угаасан гэх үндэслэлүүдээр буруутгаж байгаа аж. Өмгөөлөгч Ц.Монголын үзэж буйгаар Ц.Орхон уг хэрэгт яллагдагчаар татагдах үндэслэлгүй гэв. Учир нь Ц.Орхон 2010 оны  долдугаар сард ажлын хэсэг гаргаж, Дайны эрсдэлийн даатгалын сан нэрээр мөнгө гаргаж байсан үйлдлийг таслан зогсоож, гэрээг цуцалсан гэнэ. Үр дүнд нь гадагшаа урсах байсан дөрвөн тэрбум төгрөг МИАТ-ийн орлого болж үлдсэн гэлээ.

Сануулахад, Ц.Орхон  өнгөрөгч 2012 оны 11 дүгээр сард УИХ-ын Эдийн засгийн байнгын хорооны хуралдаан дээр ”МИАТ”-ийн алдагдалтай үйл ажиллагааны талаар тайлагнасныхаа маргааш ажлаас чөлөөлөгдөх өргөдлөө өгсөн юм. Харин ТӨХ болон МИАТ-ийн ТУЗ түүний оронд Гавьяат нисгэгч Г.Жаргалсайханыг томилсон бол Ц.Орхон захирал “Томас Эйр” компанийн захирлаар очсон юм. Тэрбээр энэ компанийг 2011 онд Ч.Хоролсүрэнгийн хамтаар байгуулсан байдаг. Эх сурвалжийн хэлж буйгаар гадаадад гуйвуулсан олон тэрбум төгрөгийнхөө багахан хэсгээр “Томас Эйр”-ийг босгоод ирсэн гэх. Мөн түүнийг Зам, тээврийн сайд А.Гансүхийн ойрын хүн гэдэг.