Т.Аятунгаагийн охиныг эх оронд нь авчрахаар хуульчдыг хөлсөлжээ

Филиппин улсад  байхдаа охин Ч.Тэргэлсарыг аваад сураггүй болсон гэх Монгол Улсын иргэн Т.Аятунгаагийн нөхөр Чарлыз Эдвард Эрген Красни өнгөрөгч оны арванхоёрдугаар сард Филлипин улсын хилээр гарч явсан талаар албаныхан мэдээлсэн. Тэгвэл сүүлд ирсэн эх сурвалжийн мэдээлснээр Чарлыз Эдвард Эрген Красни Швейцарийн холбооны улсад амьдарч байгаа, охин Ч.Тэргэлсарыг асран халамжлах  гэрээг баталгаажуулахыг хүсч буйгаа тус улсад суугаа Монгол Улсын Элчин сайдын яаманд уламжилсан байна. Мөн тэрээр охин Ч.Тэргэлсарыг Сент Киттс ба Невис гэх арлын жижиг орны иргэншилтэй болгожээ. Тиймээс Монгол Улсын иргэн Ч.Тэргэлсарыг ээжийнх нь /Т.Аятунгаа/ зөвшөөрөлгүй өөр улсын иргэншилтэй болгосон асуудлыг  холбогдох албаныхан нягтлах юм. Цаашдаа Ч.Тэргэлсарыг эх оронд нь авчрахад тодорхой арга хэмжээ авахаар хуульчид хөлсөлж, охиныг олох ажлыг эрчимжүүлж эхэлсэн талаарх мэдээллийг  ГХЯ-ны Консулын газраас  өглөө.