Амтлаг “Киви”-гийн хуучирсан “үрэл”-нүүд

Рок попын ертөнц дэх өнгөт үрэл хэмээгддэг “Киви” хамтлагийнхан өнгөрсөн хугацаанд гурван ч гишүүн сольсон. “Nature sounds” студиэс төрсөн тус хамтлагт анх Д.Уламбаяр, Ц.Намуунаа, Э.Энхзол гурав байсан. Англи, араб хэлээр чамлахааргүй сайн дуулдаг Э.Энхзол учир битүүлэг шалтгааны улмаас хамтлагаасаа гарч “В” продакшинтай хамтарч ажиллах болсон. DZ man-тэй хамт дуулж, охид залуусыг хөгжөөж явсан энэ бүсгүй одоо Америкт амьдарч байгаа бөгөөд гэр бүлийн амьдрал зохиосон гэдэг. Шинэ цомог гаргаж, багахан хэмжээний тоглолт хийхээр өнгөрсөн өвөл эх орондоо ирээд буцсан Э.Энхзол “Киви”-гийн гишүүдтэй одоо хүртэл дотно харилцаатай байдаг юм билээ.

“Киви” хамтлагийн монголжуу төрхтэй гишүүнийг Б.Халиунаа орлох болсноор амжилтанд хүрэх алхам нь хэд дахин урагшилсан гэлцдэг. Царайлаг бүсгүйн өвөрмөц хоолой Д.Уламбаяр, Ц.Намуунаа хоёрынхоос эрс ялгардаг бөгөөд өдгөө ч тус хамтлагийн зарим дууны ард “сонсогдсон” хэвээр. “Хүмүүнлэгийн элч дуучин” О.Анхбаяртай гэрлэн, хамтлагаасаа нүүр буруулсан Б.Халиунаа хөөрхөн хүүгээ өсгөхийн сацуу нөхөртэйгээ хамт дуулж яваа. Нөхөр нь хааяахан ая зохиогч Б.Ангирмаагийн хорыг малтаж “Халиунаа хамтлагаас гарсан ч гэлээ, “Киви” одоо хүртэл дууг нь ашигласаар байгаа. Та нар сайн сонсоод үзээрэй. Хуучны дуунуудаа сэргээж дуулсан гэдэг ч, ард нь манай эхнэрийн хоолой сонсогддог юм чинь” гэж ярьдаг шазруун залуу.

Хэсэг хугацаанд хэвлэлээр “дайтсан” Б.Халиунаа, О.Анхбаяр нараас болж, хамтлагийн продюссер Б.Ангирмаа эгээтэй л галзуураагүй. Тэрбээр хайр ярьж, хамаг зүйлийг нь баллаад одсон дуучин бүсгүйг буруутгахын сацуу Ц.Намуунаагийн дотны найз гэгдэх Б.Солонготой уулзаж амжжээ. Хамтлагийн ахлагч Д.Уламбаярын сэтгэлд ихэд нийцсэн энэ бүсгүй “Киви”-д төдийлөн удаагүй бөгөөд “Анод” банкны ТУЗ-ийн гишүүн асан Н.Даваагийн бэр болж одсоноор урлагийн карьерт нь цэг тавигдсан билээ. “Эр дагасан аальгүй эм” хэмээн буруутгагдаж явсан Б.Халиунааг бодвол, тэр харин ч “Киви”-гээс нэр хүндтэй гарсан нь гайхмаар. Өдгөө тэр хоёр дахь үрийнхээ зулайг үнэрлэхээр зэхэж буй гэнэ лээ.

Ээлж дараалан солигдсон гурав дахь гишүүний орон зай төд удалгүй нөхөгдөж, хамтлагийн арын албанд зүтгэж явсан шавилхан бүсгүй орж ирлээ. Дунд сургуулийн төгсөх ангийн сурагч П.Алтанцэцэг “Киви” хамтлагт дуулахыг битүүхэндээ хүсч мөрөөдөж явсан нь ийн биелэлээ олсон гэх. Өдөр ирэх бүрт өнгө зүс нэмж буй царайлаг, гоолиг бүсгүй баячуудын хөвгүүдтэй зугаалсан шигээ хамтлагаа “сурталчилж” буй.

С.Цахиур