Монголоо “алдсан” нүцгэн хүүхнүүдийн тэнэглэл

Нүцгэн биеэрээ “од” болохыг хүссэн мисс, загвар өмсөгч, жүжигчин, дуучин, хөтлөгч бүсгүйчүүдийн тэнэглэл одоо бүр дордож эхэллээ. Монгол ахуй, өв соёл, үндэсний хувцасны гайхамшгийг дэндүү эрээ цээргүй байдалтайгаа хослуулах болсон тэдний дүр зураг энд тэндхийн сонин, сэтгүүлийн нүүрэнд заларсан хэвээр... Хэдхэн халтар төгрөгийн төлөө эхээс төрсөн биеэ харуулж, эрчүүдийн амны зугаа болж яваа шалдан хүүхнүүд үндэснийхээ уламжлалыг үгүйсгэх мэт дураараа авирлах болжээ.

Хэн нь үл мэдэгдэх загвар өмсөгч хүүхний араг дээр хөлөө тавьсан бардам зураг сүүлийн хэд хоногийн турш фэйсбүүк хуудаснаа харагдаж, олны эгдүүцлийг төрүүлж буй. Зарим нь бүр түүний толгойн хэсгийг зургийг хөлөн доорхи арагтай нь сольж эвлүүлснээ ч фэйсбүүкийн найзууддаа сонирхуулсан. Монголчуудын эртнээс уламжилж ирсэн ёс заншлын нэгээхэн хэсэг болох араг дээр эмс хүүхнүүдийн хөл байтугай өмд ч хүрэх эрхгүй байлтай. Энэ шуугиан намдаж амжаагүй байтал мисс, загвар өмсөгч Х.Бадамгэрэлийн араг дээр суусан зураг асуудлыг улам ч хурцатгалаа. Хөл хүндтэй гэгдэж буй эрхэм мисстэн маань мөн л нүцгэн гуяа харуулан тухтай нь аргагүй суужээ.

Энэ мэтээр үндэсний өв уламжлал, ахуйн соёлоо орчин цагтай хослуулах гэж ядсан өрөвдмөөр зураг авалт, моделиудын эвгүй дүр зураг хөвөрсөөр л байна. Мисс И.Төгсөө л гэхэд саяхан энгэр цээжээ нүцгэлэн нялх хүүхэд хөхүүлэх гэж байгаа эх хүний дүрд хувирах гээд ядчихаж. Уг нь эргэн тойрны байдал, өмссөн хувцас, нүүр будалт бол янзтай. Даанч секси харцтай “эхийн” сэтгэл шал өөр юм руу одож, тэвэрч байгаа хүүхдээ энгэртээ ч нааж чадсангүй.

“Монгол наадам” дуугаа ВХ-тэй хослон дуулсан Нара хүртэл клипэн дээрээ үндэсний загвартай цээживч өмссөн атлаа шалдан гуяа харуулсан “хэрэг”-т унасан нь нууц биш. “Ядахдаа богино өмд ч болов, өмсчихгүй дээ” хэмээн халагласан үзэгчдэд тэрбээр энэ загварын өөрөө гаргасан гэж ярьсан гэдэг. За тэгээд, нэлээд хэдэн жилийн өмнө хөгжмийн зохиолч Б.Чинбатын дуулсан “Дэгжин нүдэн” дууны клипэнд тоглосон загвар өмсөгч А.Буяндэлгэр гэж охин байна. Олонд танигдаад удаагүй байхдаа л үндэсний дээл өмссөн гэхээсээ илүүтэй бараг нөмөрч суугаад нүцгэн зургаа авахуулсан юмдаг. Түүний араас мисс, хөтлөгч гэгдэж буй В.Гэрэлцэцэг хэмээх бүсгүй Монгол үндэсний хувцастай нүцгэн зургаараа ёстой л нэг “бөмбөгдөж” гарсан даа. Адаг сүүлд нь УДЭТ-ын жүжигчин Г.Отгонцэцэг хөдөө хээр авахуулсан эротик гэхэд хэцүүхэн зургуудаа олонд дэлгээд авлаа. Монгол гутал нь томдсон ч эс тоож, дээлнийхээ хормойн завсраар нүцгэн хөлөө харуулахаа “мартаагүй” жүжигчин маань бас л хэл аманд өртөөд амжсан.

Монголоо “алдсан” нүцгэн хүүхнүүдийн тэнэглэл энэ маягаараа даамжирвал араг дээрээ гишгэх нь байтугай Монгол гэрийн тоонон дээр ч нүцгэн суугаад зургаа авахуулж мэднэ шүү, таминь ээ.

С.Цахиур