Батаарын түр өргөө Сүхбаатарын талбайд босч байна

Батаарын араг ясыг монголчууд өнгөрөгч баасан гаригт эх орондоо авчирсан бөгөөд Гаалийн баталгаат агуулахад түр хадгалж байгаа.  Одоогоор олдворуудыг байрлуулах музей байхгүй тул Сүхбаатарын талбайд Батаарын түр үзэсгэлэнгийн байгууламжийг барьж байна. Энэ байрыг Ерөнхийлөгчийн Тамгын газар болон Ерөнхийлөгчийн хандив туслалцаагаар байгуулж байгаа аж. Уг байр нь 8 м өндөртэй 12x24м харьцаатай бөгөөд үзэсгэлэнг удахгүй болох Эх үрсийн баяраар олон нийт, жуулчдад дэлгэхээр төлөвлөж байгаа. Түүнчлэн В.И.Лениний музейг Үлэг гүрвэлийн музей болгохоор ярьж байгаа ч өмчлөлийн асуудлаархи шүүх хурал шийдвэрээ бүрэн гаргаагүй байгаагаас хойшлогдоод байгаа юм. Музейн өмчлөлтэй холбоотой шүүх хурал энэ долоо хоногт болно.