“Бүгдийг чинь ална” хэмээн заналхийлж, гал тавьжээ

Сүүлийн үед бага насны хүүхдээ хөнөөх оролдлого хаа сайгүй гарч, нийгмийг цочроогоод байна. Тухайлбал, энэ сарын 17-нд Говьсүмбэр аймгийн Сүмбэр суманд иргэн 58 настай П гэгч архи уусан үедээ гэр бүлийнхэнтэйгээ муудалцжээ. Улмаар гэртээ 7 сартай болон 2 настай хоёр хүүхэд унтаж буйг мэдсээр байж “Бүгдийг чинь ална” хэмээн заналхийлж, мотоциклийн банкнаасаа бензин авч гэр рүүгээ цацан гал тавьснаас болж хашаанд байсан хоёр монгол гэр шатжээ.

Азаар энэ үеэр 7 сартай хүүгийн ээж гал гарч буйг мэдэн шатаж буй гэр рүү гүйн орж хоёр хүүхдийг эсэн мэнд гаргаж авсан байна.Одоогоор энэ хэргийг аймгийн Цагдаагийн хэлтэст шалгаж буй юм. Түүнчлэн П-д Эрүүгийн хуулийн тусгай ангийн 91 дүгээр зүйлийн 91.2.2, 91.2.13, 91.2.16 дахь хэсэгт зааснаар эрүүгийн хэрэг үүсгэн шалгаж эхлээд байна.