Daisy-гийн охин “Бяцхан модель” тэмцээнээс хоёр шагнал хүртжээ

Ердөө л сарын өмнөхөн гэр бүлийн амьдралаа цэгцэлж, “хайр даахгүй” нөхрөө хаа дуртай газар руу нь үдэхээр шийдсэн дуучин Daisy сэтгэл санаагаар унаж, нам гүм байх болсон нь нууц биш. Гэвч хөгжимчин нөхөр нь уучлалт гуйж, хайртай эхнэрээ халамжлах болсноор тэдний хооронд гарсан үл ойлголцол арилсан аж. Дуучин бүсгүй ч дөрвөн хүүхдийнхээ хүмүүжилд анхаарч, урьдын амьдралдаа эргэн орсон бөгөөд саяхан “Era” төвөөс зохион байгуулсан “Бяцхан модель” тэмцээнд охиноо оролцуулжээ.

Авьяаслаг бяцхан охин нь уг тэмцээнд нэлээд хүчтэй өрсөлдөж хоёр ч шагналын эзэн болоод авчээ. Олон хоног бэлтгэл хийж, тэмцээний эцсийн шалгаруулалтын өдөр өөрт байгаа бүхнээ харуулах гэж чармайсан хөөрхөн охин нь “Эко элч” өргөмжлөлөө гардаад хоёр дахь шагналаа авч амжилгүй харьжээ. Ийнхүү хөгжимчин аав, дуучин ээжийн бяцхан охин ирээдүйд загварын ертөнцөд цахиур хагалах модель болно гэдгээ харуулж, олон хүнээс магтаалын үгс сонссон гэнэ лээ.

С.Цахиур