“Татар”-ын цомог 1000 төгрөгт хүрч, тоглолт нь ”үнэгүйджээ”

“Татар”, “Second album”, “Ганцаараа” зэрэг цомог гаргаснаас гадна “Хайрыг хүндэл” хэмээх анхны бие даасан тоглолтоо хийж байсан “Татар” хамтлаг энэ онд 10 жилийнхээ ойтой золгож байгаа. Хэдийгээр чамлахааргүй хугацаанд тус тусынхаа замыг хөөсөн ч хип хоп урлагийн төлөө дахин нэгдсэн “Татар”-чууд 10 насныхаа төрсөн өдрөөр “Нөлөөллөөс дээгүүр” хэмээх шинэ цомог, архины эсрэг төслийн хамт үзэгч, фенүүдтэйгээ уулзахаар шийджээ. “Эсрэг өдөр” дууны үргэлжлэл болох “Нөлөөллөөс дээгүүр” дуугаараа тэд нийгэмд буй архи, тамхины хэрэглээг багасган, сонсогч залуустаа хор уршгийг нь сануулахыг хүсчээ.  

Үүгээр ч зогсохгүй, “Татар”-ын дууг өнөөг хэр нь сонсох дуртай фэнүүддээ талархан олон сюрприз зэхжээ. Тухайлбал, тэдний гаргасан “Нөлөөллөөс дээгүүр” цомог нь 1000 төгрөгөөр худалдаанд гарах бөгөөд нийслэлийн бүх дүүрэгт нийт 60 удаа хийх тоглолтоо үнэ төлбөргүй сонирхуулах гэнэ. Мөн тоглолтын хугацаанд хандивын данс ажиллуулж, дээрхи тоглолтуудаас цугласан мөнгийг архины эсрэг үйл ажиллагаа явуулдаг байгууллагуудад хандив болгож өгөхөөр шийдсэн юм байх. Бүх дүүрэгт “Татар” хамтлагийн фен клуб байгуулагдах учраас тоглолт хэзээ, хаана болохыг тухай бүрт нь фэйсбүүк хуудсаараа дамжуулж мэдээлэх болно гэдгээ дуулгалаа, тэд. Энэ бүхний эцэст буюу ирэх сарын 7-ны өдөр “Үндэсний соёл амралтын хүрээлэн”-д фэнүүдтэйгээ хамт бут авахаар төлөвлөсөн “Татар” хамтлагийнхан тоглолтоо ямар ч такс, тасалбаргүй сонирхуулна гэсэн шүү.

С.Цахиур