Н.Соёлмаа: Би одоо тийм гаж амьтан юм байх даа

Хэлье гэснээ хэний ч өмнө хэлчихдэг, шударга нь дэндсэн гэмээр ил задгай яриатай дизайнер Н.Соёлмааг хүндлэх хүн олон бий. Гайхалтай загваруудаараа олон улсын наадмаас шагнал “бөөндөж”, өөрийн гэсэн салонтой болоод амжсан тэрбээр нэг хэсэг “Амьдрал аа гэж” нэртэй нэвтрүүлэг хөтөлж байсан удаатай. Гэвч улстөржиж эхэлсэн нэвтрүүлгийн бодлого нь таалагдахаа больсон тул Н.Соёлмаа загвараа хөөцөлдөөд явчихсан гэдэг. Энэ тухайгаа дизайнер маань “Амьдрал гэдэг чинь тэр чигээрээ философи. Ярихаас ч уйтгартай” гэсэн бөгөөд ур ухаанаа шингээж бүтээсэн загварыг нь газарт чулуудаж орхидог мисс, загвар өмсөгчдийг алгадаж явснаа хүртэл нуудаггүй.

Ач, зээгээ тэвэрсэн хэдий ч өөрөөсөө 10 гаруй насаар дүү залуутай хамт амьдарч, хамраа өндөрсгөсөн Н.Соёлмааг ааштай, адтай хэмээн ярилцдаг ч тэрбээр “Би гайхаад байдаг юм, манай аав ээж хоёр их даруу төлөв, дөлгөөхөн улсууд. Эмээ ч гэсэн даруухан. Манай ах дүү нар дотор над шиг юм нэг ч байхгүй. Зарим нь танай эгч мөн юм уу, ямар сонин өөр араншинтай юм гэдэг. Би л ганцаараа гэрээсээ ийм зантай. Нэг найз маань “Чи яахаараа ийм гаж зантай юм бэ” гэсэн. Би одоо тийм гаж юм байх даа. Гаж юм надад байдаг юм уу. Би яахав, дотроо бодсноо хамаагүй ил задгай л хэлчихдэг хүн. Ил задгай ярьдаг гээд би хүний нууцыг яриад байхгүй” гэж эгдүүцдэг ажээ.

С.Цахиур