“Луйврын хот”-ын луйварчин гэгдэж буй Г.Анхбаярын наймаа

Хамгийн анх “С1” телевизийн “Шоубиз” нэвтрүүлгийг хөтлөн алиалах, жүжиглэхийн хооронд аяглаж явсан Г.Анхбаяр гэгч залууг үзэгчид андахгүй. 2009 оны хавар “Луйврын хот” нэртэй кино хийнэ хэмээн Ардчилсан намынхантай сүжирч явсан тэрбээр бараг жил хагасын дараа мөнөөх бүтээлээ дэлгэцэнд гаргасан. Нэртэй найруулагч, алдартай жүжигчдээр багаа бүрдүүлж, реклам сурталчилгаандаа асар их мөнгө зарцуулж явсан Г.Анхбаяр нэг л өдөр “Бүгд намайг орхилоо, би улстөрчдөд хулхидуулсан хүн” гэж зарлах нь тэр. Киноныхоо гол дүрд сонгосон жүжигчид нь мөр мөрөө хөөсөн тул мань эр дуучин, загвар өмсөгч, хөтлөгч зэрэг “од” болох хүсэлтэй охид хүүхнүүдийг панаалджээ. Өнөөдүүл нь янз бүрийн сурталчилгаанд тоглож олсон мөнгөөрөө кинонд нь нэмэрлэж, хүссэн дүрүүдээ авсан гэлцдэг.

Тэгвэл одоо мань эр МАН-ынхантай дотносон өнөө муу АН-аа үгийн муугаар дайрч яваа. “Луйврын хот” киног нь ивээн тэтгэнэ гэчихээд нүүр буруулсанд нь голдоо ортол гомдож явдгаа харин ч нэг хатуухан хэлсэн жүжигчин залууг урлагийнхан шүүмжилж эхэллээ. Тухайлбал, тус киноны төсөлд хамтарч ажиллаж байсан дуучин Quiza буюу Б.Батцэнгэл, төслийн удирдагч А.Амундра нар мэдэгдэл хийсэн бөгөөд “Анхаа хариуцлага алдаж гэрээний хугацаанд кино зохиолоо бичээгүй. Сүүлдээ бүр “Би өөрөө зохиолоо бичиж, киногоо найруулж, гол дүрд нь тоглоно” гээд уран бүтээлчдийн дургүйг хүргэсэн. Тэгээд одоо улс төрөөр шоу хийж, намуудыг шантаажилж явдаг болж” хэмээн ярьжээ.