Жүжигчин Б.Навчаа: Би агсам тавиагүй, үнэхээр муу кино болсныг нь ч нуугаагүй

“Хэцүү анги”, “Помогите нам”, “Би эмэгтэй хүн”, “Гоёлын даашинз”, “Рашаантын 18” зэрэг олон киноны дүрээр үзэгч олны хайр хүндлэлийг хүлээсэн жүжигчин Б.Навчаа хамгийн сүүлд “Ларьдма” киногоо дэлгэцэнд гаргасан билээ. Уг киноныхоо продюссер, найруулагч, жүжигчнээр ажилласан тэрбээр мэргэжилтнүүдээс өндөр үнэлгээ авч байгаа. Гэтэл саяхан нээлтээ хийсэн "Хориотой загвар" киноны нээлтийн дараах “банкет” шоунд оролцсон жүжигчин Б.Навчаа тасартлаа ууж согтон тус киног муу бүтээл хэмээн уран бүтээлчдэд нь агсам тавьсан гэх мэдээлэл олны дунд түгжээ. Үүнийг нь сонсоод “Олсон жаахан нэр хүндээ цэвэр байлгаж, бусдын хайр хүндэлийг дааж яваасай” хэмээн шүүмжлэх нэгэн байхад “Тийм зүйл хийх хүн биш” гэж өмөөрөх нэгэн ч таарлаа. Ингээд уг мэдээллийн талаар лавлаж жүжигчин Б.Навчаагаас тодруулснаа хүргэе.

-Уучлаарай, таныг “Хориотой загвар” киноны нээлтийн дараах арга хэмжээн дээр агсам тавьсан. Уг киног муу болсон гээд уран бүтээлчид рүү нь давшилсан гэх мэдээлэл гарч. Энэ үнэн үү?

-Тийм юм болоогүй ээ. Угаасаа муу кино болсон гэдэг нь үнэн юм чинь. Би нээлтэн дээр нь ч очоогүй.

-Энэ кинонд та өөрөө тоглосон биз дээ?

-Тэгсэн. Шинэ жилийн өмнө хийсэн кино л доо. “Тийм муу кино хийгээд байхдаа яахав дээ” гэж уран бүтээлчдэд нь ч хэлсэн. Угаасаа дэлгэцэнд гарахаар хүмүүс ямархуу муу кино болсныг хараад л ойлгоно. Тэрнээс биш, би тэгж агсам согтуу тавиад явсан юм алга.

-“Болсон болоогүй баахан кинонд тоглож байсандаа харамсдаг” гэж та урьд нь ярьсан удаатай. Тэгвэл энэ кино таны хувьд, муу гэж үнэлэгдсэн бүтээлийн чинь нэгд тооцогдсон хэрэг үү?   

-Тийм ээ. Үнэхээр муу кино болсон юм чинь.

-Жүжигчний хувьд, анх кино зохиолтойгоо танилцаад татгалзах боломж байсан байх?

-Кино зохиол гээд нэг хошин шогийн юм авчирч өгсөн л дөө, тухайн үед. Гэтэл энэ киног манай найз хүүхэн ивээн тэтгээд багагүй хэмжээний мөнгө зарлагадаж бүтээсэн. Би ямар найзынхаа гуйлтыг хүлээж авахгүй зугталтай нь биш. Тэгээд л кинонд нь тоглохыг зөвшөөрсөн хэрэг. “Уран бүтээлчдийн баг бүрдүүлнэ” гээд байсан. Сүүлд нь очоод харсан чинь шал сонин баг бүрдүүлчихсэн байхаар нь “Өө, чааваас” гээд халагласан. Найз хүүхэндээ ч хэлсэн. “Энэ чинь их муу кино болох нь. Эртхэн больсон нь дээр” гэсэн ч ер халгаагаагүй юм. Одоо яая гэхэв дээ.

-“Ларьдма” киноны тасалбар эрэлт ихтэй байгаа энэ үед үзэгчид “Өдөрт яасан цөөхөн удаа гаргадаг юм бэ” гэж гомдоллосон гэсэн. Та ч гэсэн, кинотеатрынханд гомдолтой яваа гэл үү?

-Тэр үнэн. “Өргөө” кинотеатрынхан гадаад киногоо дээш нь татаж, Монгол киногоо доош нь чихдэг муухай газар. Уг нь үзэгч ихтэй байгаа киног өдөрт олон удаа гаргавал зүгээр ш дээ.

-Сүүлийн үед та ямар уран бүтээл дээр ажиллаж байна вэ. Аль эсвэл амралтын байдалтай байна уу?

-Одоохондоо ямар нэг уран бүтээл дээр ажилласан юм алга аа. “Их идсэний маргааш өнж” гэдэг шүү дээ. Ийм сайн уран бүтээл хийчихээд араас нь муу бүтээл хиймээргүй байна. Яараад яахав, цаг нь болохоор чанартай уран бүтээл дээр ажиллах байлгүй.