Ш.Алтантуяагийн төлөө боссон эмэгтэйчүүд Малайзын Ерөнхий сайдын дургүйг хүргэжээ

Одоогоос долоон жилийн өмнө монгол эмэгтэй Ш.Алтантуяа Малайз улсад амиа алдсан ч одоо хүртэл хэргийн буруутнуудыг олоогүй байна. Чухам хэн түүнийг хөнөөж, гэр бүлээс нь салгаж, хоёр хүүхдийг нь өнчрүүлэв. Үүнийг элэг нэгт монголчууд хамгийн ихээр мэдэхийг хүсч байна. Гагцхүү манай Монголчуудаас гадна Малайзууд ч илүүтэйгээр хэн буруутайг тогтоохыг хүсдэг хэмээн тус улсын хэвлэлүүд бичжээ. Энэ учир нь тайлагдашгүй хэрэгт Малайзын өнөөгийн Ерөнхий сайд Нажиб Разак холбоотой гэдэг нь олны анхаарлыг татаад буй. Тэгвэл амиа алдсан монгол эмэгтэйн төлөө хэсэг монголчууд нэгдэж Ерөнхий сайд Нажиб Разак болон түүний эхнэр Росмах Мансор нарыг бүхэл бзтэн долоон жил шийдэгдээгүй хэрэгт хариу өгөхийг шаарджээ. Энэ нь тэдний анхаарлыг татаж, дургүйг нь хүргэсэн талаар хэвлэл мэдээллээр цацагдах болсон байна. 

Тодруулбал, энэ сарын долооны өдөр Малайзын нийслэл Куала Лумпур хотноо болсон Дэлхийн эмэгтэйчүүдийн чуулга уулзалтын үеэр Монгол эмэгтэйчүүд тус улсын Ерөнхий сайд болон түүний эхнэрээс хариулт нэхсэн нь олны дэмжлэгийг авч чаджээ. Энэ үеэр Монголын эмэгтэйчүүдийн холбооны ерөнхийлөгч Ж.Эрдэнэчимэг хэвлэлүүдэд ийнхүү тайлбар хийсэн байна. Тэрээр “Ш.Алтантуяагийн хэргийг дахин шалгаж эхлэх хэрэгтэй. Энэ шалгалт түүний үхэлд хэн буруутай болохыг ч хэлж өгөх ёстой, эхийн хайрыг мэдрэлгүй өсч буй хоёр хүүгийн төлөө хариуцлага хүлээж хэрэгтнүүдийг яаралтай олох ёстой ” гэжээ. Мөн түүний хүүхдүүдэд санхүүгийн тусламж хэрэгтэй байгааг ч дурдсан байна. Түүнчлэн Малайзын Эмэгтэйчүүд, Гэр бүл, Олон нийтийн хөгжлийн яамыг тус асуудалд онцгой анхаарал тавихыг хүсчээ. 

Г.Бүжин