Мисс Ч.Содтуяа өвөрт нь “эрхэлсэн” өрсөлдөгчөө таниагүй явжээ

Загварын ертөнцийн “эм хоёр загал”-аар тодорч явсан мисс Ч.Содтуяа, Х.Бадамгэрэл нарын үерхэл хэдхэн жилийн настай байжээ. Миссийн тэмцээний тэргүүн байрт шалгаруулан, өөрийн итгэлт хүнээр сонгож авсан шавилхан охин нь нэг л өдөр хаяж одно гэдгийг Ч.Содтуяа санаагүй бололтой. Тэрбээр загварын шоу хэсээд хийж бүтээсэн гавьтай зүйл байхгүй явсан мисс Х.Бадамгэрэлийг “Asia model” агентлагийнхаа гүйцэтгэх захирал болгосноор ийнхүү хамаг нууцаа алдахад хүрчээ. Агентлагийнхаа охидод багшилж, олон улсын арга хэмжээнд ахлан явж, томоохон гэрээнээс өгсүүлээд хөрөнгө орлогын бүхий л асуудлыг хариуцаж байсан Х.Бадамгэрэл ч багагүй зүйл сурсан нь мэдээж.

Бизнесийн шаггүй мэдлэгтэй, дуучин залууг амрагаараа сонгосон мисс Х.Бадамгэрэл хуурай эгчийнхээ өвөрт “эрхэлж”, агентлаг байгуулах нууц төлөвлөгөөгөө хэрэгжүүлж явсан аж. Тиймээс нэг л өдөр “Asia model” агентлагийн суралцагчид, багш нарыг урвуулаад одсон мисс бүсгүй “Andra international management” агентлагаа байгуулсан гэдэг. Харин мисс Ч.Содтуяа хөөрхөн аашилсан хуурай дүү нь ийн хүчтэй өрсөлдөгч болоод гарч ирэхэд дотроо харуус, агентлагийнхаа ажлыг бусдад даалгахаа больсон гэнэ.