Нийтийн дууны гурван “МАА”-г хөдөөгийн залуус хоргоожээ

Эхийн тухай дуугаар хосолсон нийтийн дууны гурван хатагтай болох гавьяат жүжигчин Х.Болормаа, Р.Дэлгэрмаа, Э.Оюумаа нар өнгөрсөн Олон улсын хүүхдийн эрхийг хамгаалах өдрөөр хамтарсан тоглолт хийж фэнүүдээ баярлуулаад авсан билээ. Эх үрсийн элбэрэл хайрын дуунуудыг сэргээн дуулж, сонирхолтой клипээр нийслэлчүүдээ баярлуулсан дуучид хөдөөгийн зүг хүлгийн жолоо залсан. Жилийн өмнөөс эхэлсэн “Гурван МАА” төслийнхөө хүрээнд гурван бүсгүй хөдөө орон нутгийн үзэгч, сонсогчдоос өндөр үнэлгээ авсан бөгөөд аялан тоглолтоо саяхан дуусгаад иржээ.

Олны сэтгэлд хоногшсон эхийн тухай дуунуудыг сэтгэл сэргэтэл амилуулж буй дуучин бүсгүйчүүдийг хөдөөгийнхөн явуулахгүй хоргоож, тоглолтынх нь үеэр нэг дууг бүр зургаан удаа дахиулсан тохиолдол ч гарсан гэнэ. Хамгийн багадаа л гэхэд, тэд Сэлэнгэ аймагт хоёр удаа тогложээ. Ийнхүү дурсамж ихтэй аялан тоглолт хийхэд нь гавьяат жүжигчин, дуучин Х.Болормаагийн нөхөр болох авьяаслаг продюссер Аранзай буюу Б.Бат-Эрдэнэ ихээхэн үүрэг гүйцэтгэсэн гэнэ лээ.