Сайд асан Н.Хүрэлбаатарын ангийн нөхөд Ц.Элбэгдоржид захидал илгээжээ

Баригдаж, хоригдоод байгаа сайд асан Н.Хүрэлбаатартай хамт Анагаах ухааны их сургуулийг 1991 онд төгссөн төгсөгчид Монгол Улсын Ерөнхийлөгч Ц.Элбэгдоржид захидал илгээжээ. Захидалд: Бидний хэсэг залуус тэртээ 1991 онд анагаах ухааны дээд сургуулийг төгсөж өнөөдрийг хүртэл  ард түмнийхээ эрүүл мэндийн манаанд хоёргүй сэтгэлээр зүтгэж явна. Та биднээс цөөхөн ах. Биднийг сургуулиа төгсөж байхад  Монгол улс  ардчилсан тогтолцоо руу шилжиж байсан үе. Энэ их үйл хэргийн дуулиан болгоныг дэмжиж таниар болон хамтран зүтгэгч нараар тань бахархаж одоо яах бол гэсэн сэтгэлийн догдлолтой явцгаадаг байлаа. Бидний дунд өнөөдөр олон сая төгрөгийн хэрэгтэн гэж цоллуулаад байгаа ангийн анд Н.Хүрэлбаатар мөн л гүйж явдаг байсан. Өнөөдөр бид нас дөч гарцгаалаа. Цаг хугацааны хаан бүгдийг өөрчилжээ. Таныг ч бас. Бидний мэдэх Ээбээ танигдахааргүй бүр огт өөр хүн  болчихож.  Манай төгсөлтийнхөн  дунд  Төгсгөл кино дээр улаан ч  байна шар ч  байна гэдэг шиг АН-ынхан ч , Ман-ынх ч байна. Нам бусчууд ч байна.Биднийг нэг л зүйл нэгтгэдэг. Тэр нь Анагаах ухааны дээд сургууль   бас эмч гэдэг алдар. 

Бид МАН намын сайд Н.Хүрэлбаатарыг сайн мэдэхгүй, харин мэргэжил нэгт эмч багш  Хүрэлбаатарыг дэндүү сайн мэднэ.  Анагаахыг төгссөн,  энэ салбарт ажиллаж байгаа олон олон цагаан халааттанууд энэ хүнийг  мэднэ.  Тиймийн учраас бид ярилцаад энэ хүнийг суллуулахын тулд  энэ сонгуульд таны төлөө саналаа өгөхөө хариуцлагатайгаар амлаж байна.Харин та наад хүнээ шоронгоос гаргачих.  Шалгах юм байвал гадуур байлгаад шалгачих. Наад хүн чинь хаашаа ч зугтаагүй зугтах ч үгүй. Шаардлагатай бол бид бүгдээрээ  батлан даая.  Та авилгачидтай амжилттай тэмцэж байнаа. Ёстой үзүүлж өгч байна. Тэр их хичээл зүтгэлээ үнэлүүлэхийн тулд аль болох олон ангийн дайсныг илрүүлж цээрлэл үзүүлэх  нь зүй ёсны үйлдэл.  Бид ч дэмжиж  байгаагаа уламжилая.  Гагцхүү  шүүхээр гэм буруутай нь тогтоогдоогүй байхад  гэмт хэрэгтэн болгож олон нийтэд түрүүлж зарлачихаад  дараа нь тэрийгээ нотлох гэж улайрдаг  садист  үйлдэлд  эргэлзээ төрөөд байнаа. Таны нөгөө магнай дээрээ туг болгон тунхаглаж явсан хүний эрх, эрх чөлөө чинь салбайсан цаасан дарцаг шиг харагдаад байна.   Энэ захидлыг уншаад та , миний ажил үүргийн чигт огт хамаагүй , надад хамаагүй гэх байх.  Гэтэл  цагдаа, прокурорынхон  дотор чинь  бидний найз нөхөд, танилууд зөндөө бий. Тэд энэ бүхэн  сонгуультай холбоотой гэж шивнээд байна. Сонгууль надад хамаагүй  гэж л  та, битий хэлээрэй.   Тийм учраас бид ярилцаад таны төлөө саналаа өгөхөөр шийдсэн юм. Та харин эмч Хүрэлбаатарыг сулла.  Яагаад гэвэл энэ сонгууль таны сонгууль. Бидний  хувьд  тэртээх тарчигхан оюутан ахуйд ижилсэж,нөхөрлөж  олдсон ганц гөөхийгөө хувааж явсан  нэг нөхрийнхөө төлөө тэгж их хүсээд байгаа, хүний эрх чөлөөнөөс ч үнэтэй тэр саналыг тань өгөхөд бэлэн байна.  Шудрага үнэн таны талд байх болтугай.  Сонгууль болохоос өмнө таны төлөө сонголтоо хийсэн 1991 оны Анагаах ухааны сургуулийн төгсөгчид. Бусад төгсөгчдөөсөө мөн ерөнхийлөгч Элбэгдоржийн төлөө саналаа өгөхийг дотночилон хүсч байна.” гэжээ.