Загварын ертөнцийн загварлаг найзууд буюу топ моделиудын нөхөрлөл

Хэл ам, атаа жөтөө, шинэ хуучны ялгаа, хөрөнгө чинээтэй эрчүүд гээд л загварын ертөнцийг тойрсон асуудал тасрахгүй мэт. “Нэг үхрийн эвэр доргивол мянган үхрийн эвэр доргино” гэгчээр хөнгөн амьдрал хүсэмжилсэн зарим нэг моделиос болоод загвар өмсөгч хүүхнүүд заавал баян эрчүүдтэй нэр холбогдох ёстой мэтээр хүмүүс ойлгодог хэмээн өөрсдийгөө өмөөрөх нь ч бий. Ил далд өрнөсөн ширүүхэн өрсөлдөөн дундаас өөрийн авьяас чадвар, гоо үзэсгэлэн, мэдлэг туршлагаараа ялгарч чадсан топ модель, шилдэг загвар өмсөгчид үй зайгүй дотно найзууд болох нь олонтаа.

Загварын ертөнц дэх загварлаг найзууд буюу топ моделиудын нөхөрлөл цаанаа л нэг ондоо гэдэг нь илт мэдэгддэг. Адаглаад л, томоохон арга хэмжээнд очихоор төлөвлөхдөө стиль имижээ хүртэл адилтгадаг нь тэдний хувьд “бичигдээгүй хууль” мэт. Шоу цэнгээн, хүлээн авалт, загварын арга хэмжээг чимсэн олны танил сайхан бүсгүйчүүд өөр хоорондоо өмссөн зүүснээрээ сэм өрсөлддөг, бас хэтэвч зузаантай найз залуусаа булаацалдах нь ч энгийн зүйл болоод байгаа.