Дуучин Ч.Цэлмүүн: Би уран бүтээлээ орхиогүй, дахиад цомог гаргана

Гэр бүлийн амьдралдаа анхаарал хандуулаад урлагийн ертөнцөөс залхаж байгаа тухайгаа илэрхийлэн, рок попынхны дургүйг хүргэж байсан тэрбээр дахин дуулахаар зэхжээ. Түүгээр ч барахгүй, хоёр дахь цомгийнхоо ажилд орсон тул шинэ дуунуудаа эхнээс нь дүрсжүүлэх болсон гэнэ.

“Exodus” нэртэй анхны бие даасан цомгоо гаргаад уран бүтээлдээ цэг тавьсан гэж байсан ч дуучин бүсгүй энэ бүхнийг үгүйсгэн “Би уран бүтээлээ орхиогүй шүү дээ. Дахиж цомог гаргахгүй гэж амлаагүй. Харин ч бүр хоёр дахь цомгоо ирэх жилээс гаргах гээд зүтгэж байна” гэж ярьжээ. Тэгэхээр нэг хэсэг урлагаас залхсан Ч.Цэлмүүн гэртээ суухаас уйдсан уу, яасан. Уран бүтээлдээ эргэн орж, дахин олны анхаарлын төвд байхаар шийджээ.