Сүхбаатарын талбайд бүх нийтээрээ бүжиглээд л “балай” авах нь дээ

Үндэсний их баяр наадмын энэ жилийн нээлтийн арга хэмжээ болон хаалтын тоглолтыг Төрийн соёрхолт, Монгол Улсын гавьяат жүжигчин Д.Сосорбарам найруулж буй. Чамгүй хөрөнгө мөнгө зарцуулан зохион байгуулж буй их ажлын хүрээнд жил бүр уламжлал болгон хийдэг зарим зүйлийг тэрбээр өөрчлөхөөр шийдсэн аж. Тухайлбал, наадмын 11-ний үдэш Сүхбаатарын талбайд рок поп, нийтийн дуучид болон бусад хамтлаг, уран бүтээлчид ая дуугаа өргөж, цэнгүүн зохион байгуулдаг байсан бол, өдгөө наадамчин олныг нийтийн бүжигт урихаар төлөвлөж байгаа аж.

Энэ арга хэмжээг нэлээд өвөрмөц байдлаар хийхээр зэхсэн Д.Сосорбарам гавьяат ажлынхаа тайлан Монгол Улсын Ерөнхий сайд Н.Алтанхуягт дуулгасан бөгөөд “Зүгээр л нэг хэдэн хамтлаг, дуучид тоглоод өнгөрдөг жирийн хэмнэлтэй баярламааргүй байна. Яадаг юм бэ, бүх нийтээрээ төв талбайд бүжиглэсэн ч болно шүү дээ” хэмээн хоёул санал нэгдсэн аж. Үүнийгээ ч зохих албаны хүмүүст нь дуулгаж, наадамчин олноо нийтийн бүжигт урилаа.