“Нөлөөллөөс дээгүүр” тоглолтын нөлөөллөөс доогуур байдал буюу “Татар”-ын үдэш

Монгол Улсын Ерөнхийлөгчийн сонгуулийн сурталчилгаа эхлэхтэй зэрэгцээд олны анхаарлыг татсан нэгэн зүйл бол “Татар” хамтлагийн “Нөлөөллөөс дээгүүр” аян. Монголын хип хопын ертөнцөд өвөрмөц арга барилаараа фэнүүдээ танил болсон гэгддэг “Татар”  хамтлаг энэ жил 10 нас хүрч байгаа юм. Энэ ч утгаараа, хэдэн жилийн өмнөөс эхлэн тус тусынхаа мөрийг хөөсөн гурван залуу эргэж нэгдэн “Нөлөөллөөс дээгүүр” цомог гарган, улмаар бүх нийтийг хамарсан аян зохион байгуулсан аж. Охид залууст амьдралын зөв хэв маягт суралцан, архины эсрэг нөлөөллөөс дээгүүр амьдрахын уриалсан энэхүү аяныхаа хүрээнд нийслэлийн бүх дүүрэгт очиж тоглолтоо хийсэн гэх “Татар”-чууд өнгөрөгч бямба гарагт UB palace-ын Open Air-т фэнүүдтэйгээ бут авах амлалтаа “хэрэгжүүлсэн” болов.

Тэднийг ийн гэнэтхэн сонгуулийн сурталчилгаатай зэрэгцэн гарч ирж, цомог болон клипээр “бөмбөгдөх” болсон шалтгааныг хүмүүс “Аль хэдийнэ тарж бутарсан “Татар”-ынхан ямар намыг сурталчлаад байна вэ” хэмээн хардаж эхэлсэн нь нууц биш. Тиймдээ ч, дуучин залуус “Нөлөөллөөс дээгүүр” дууныхаа клипийг сонгууль дуустал олон нийтэд цацахгүй гэж томорсон ч, яг санал хураах өдрөөс хэдхэн хоногийн өмнө дэлгээд амжсан. Сонин сэтгүүлийн хуудаснаа заларч, телевизийн нэвтрүүлэг хэсэн хэрэндээ л зөв амьдралыг уриалж явсан тус хамтлагийнхан их л олон зүйлийг фэнүүддээ амлаж, долдугаар сарын 5-нд болох тоглолтоо зад сурталчилсан.

Харамсалтай нь, олныг сэнхрүүлэх гэсэн чамин яриа төдийгүй загварлаг хэв маягтай тоглолтын тасалбар нь бүгд шоу байжээ. 10 жилийнхээ ойн баярт зориулсан томоохон хэмжээний тоглолтоо сүүлийн үед Монголд болж байгаагүй тун өвөрмөц байдлаар хийнэ гэсэн тэдний үлгэр дэндүү инээдтэй болох нь нотлогдсон. Open Air-т багтахгүй шахам дүүрэн үзэгчтэй, тэд нь удтал хүлээсэн “Татар”-чуудыгаа хараад сэтгэл хөдлөлөө барьж чадахгүй үймээн дэгдээнэ гэж төлөвлөсөн хип хопчид хэдэн машин дүүрэн цагдаа авчирч сүржигнэсэн нь өрөвдмөөр. Үнэндээ хэдэн мянган хүн ирж үзнэ гэсэн тооцоо нь алд дэлэм зөрж, тоглолтын талбайд ердөө л 200 хүрэхтэй үгүйтэй хүмүүс цугласан учир цагдаа нар бугуйн цагаа харж эвшээж суухаас өөр ажилгүй суусан. Зарим нь бүр UB palace-ын хоёрдугаар давхрын шатны хажууд байрлуулсан буйдан дээр чихэлдээд унтчихаж.

Хар шил, костюмаар ижиллсэн хөөрүү хамгаалагчид охид залуусыг загнах, зандрахын хооронд дугаарлан байж оруулсан тоглолтын талбайд ус, ундаа, жүүс мэтийн үнэ бараг л тэнгэрт хадсан гэлтэй. Мөн хиймэл сувс, шүр, сувдаар хэлхсэн гоёл чимэглэлийн лангуу ч байж байх шиг. Амихандаа тоглолт эхлэхээс өмнө аятайхан шиг суух газар олох санаатай тав, арван минутын өмнө орсон хүмүүст 00-д орно гэдэг хүндхэн асуудал болж хувирсан. Учир нь, зориулалтын суудал байхгүй тул талбайн хоёр талын шатан дээр бор шувуу шиг эгнээд суучихсан үзэгчид хашааны мухар, барилгын буланд очиж бие засах юмуу арай соёлтой нь UB palace-ын ариун цэврийн өрөөг зорих аж. Гайхалтай нь, бие засах газар байтугай суучихмаар томоохон чулуу ч олдохгүй Open Air-т тэгж их олон хүн цуглана гээд цагдаа нарыг “бөөндсөн” шигээ 00-д орох төлбөрийг нь зохицуулж болоогүй л юм байх даа. Орох бүртээ 100 төгрөг төлсөн иргэд адаглаад ариун цэврийн цаас авчих боломжтой баймаарсан.

Өдөр нь жигтэйхэн халуун байсан болохоор ч тэгсэн үү, яасан. Чулуун шат бүлээсэн байсан учир үзэгчид тэгтлээ түүртээгүй биз. Харин 19.00 цагт эхлэх ёстой байсан мөнөөх тоглолт нь 20.53 цагт эхлэх үеэст өөрийн эрхгүй жиндсэн байх аа, тэр лав үнэн. Хүлээж цөхөөд сүүлдээ бүр даарч, ядарсан хөөрхий үзэгчдээ “Татар”-чууд тоосон шинжгүй, тайзны ард телевизийнхэнд ярилцлага өгсөөр зогсох нь гайхмаар. Арайхийж эхэлсэн тоглолтыг нь “Мөрөөдлийн театр”-ын жүжигчин залуу хөтлөх гэж аядан бараг л өөрөө шоудсаар байгаад таарсан. “Татар” хамтлагийн түүх болон өөрсдийнх нь яриаг тайзан дээр байрлуулсан дэлгэцээр үзээд залхсан хүмүүс дургүйцлээ илэрхийлэн шуугилдсаар сая нэг юм тэднийг “амьд”-аар нь харав. Хэдийгээр хөлөө эцтэл зогсон, хүйтэнд жиндэж хүлээсэн тоглолт ч гэлээ, үзэгчид энэ өдөр “Нөлөөллөөс дээгүүр” байж чадсангүй. Тамхины утаа баагиулан, архи сэнгэнүүлэх охид залуус нэлээдгүй харагдах ч тэдний үйлдлийг хянаж, хориг тавьж байгаа хүн лав харагдаагүй. Харин ч бүр хамгаалагчид нь хүртэл тамхилж зогсоо “Нөлөөллөөс дээгүүр” тоглолтын ард нөлөөллөөс доогуур үйлдэл олон гарсан бөгөөд үзэгчид лаазтай пиво шимсэн шигээ сууж байлаа.

Дөрвөн ч цомог гаргасан гэх тус хамтлагийнхан энэ үдэш хит дуунуудаа бараг дуулсангүй. Тоглолтод нь дуучин Ж.Хишигдалай, A-Cool, “Киви” хамтлагийн Ука болон break dance, beatbox-чид ирж оролцсоныг эс тооцвол тэд ердөө ч сонирхол татсангүй. Цөөн хэдэн хит дуугаа дуулах үест нь бараг хашааны хаалгаар гарч явсан үзэгчид эргэн орж баярламар аядсан юм чинь. Үзэгчдийнхээ дунд уралдаан гэхэд ч ичмээр хачин юм зохиогоод хэдэн гутлын алчуур, тос, өнгөлөгч өгөөд аргалсан. Өөр тэнд сюрприз гээд нэрлэчихмээр зүйл байгаагүй гэхэд хэтрүүлсэн болохгүй биз. Арван нас хүрсэн “Татар”-уудтай хамт ийн нэг үдэш залхмаар “уйтгарласан” үзэгчид 23.55 цагт салют харсан болоод харихын түүс байсан юмдаг. “Нөлөөллөөс дээгүүр” тоглолтын нөлөөллөөс доогуур байдал ийм л байж дээ.

С.Цахиур