Ц.Элбэгдорж: Хүүдээ итгэх адил надад итгэсэн ард түмэндээ ихэд баярлалаа

Монгол Улсын Ерөнхийлөгч Ц.Элбэгдорж Тулгар төрийн 2222 жил, Их Монгол Улсын 807 жил, Ардын хувьсгалын 92 жилийн ойн Үндэсний их баяр наадмыг нээж ард түмэндээ хандан үг хэллээ. Тэрбээр "Монголын түүхт их төр 2222 жилийн ойгоо тэмдэглэж байна. Монголоороо гоёсон монгол наадмынхаа босго өдөр Монгол Улсын Ерөнхийлөгчийн тангаргаа хоёронтоо өргөлөө. Хүүдээ итгэх адил надад итгэсэн ард түмэндээ ихэд баярлалаа. Аав , ээжийнхээ ачийг хариулах шиг ард түмэн та нарынхаа төлөө зүтгэнэ. Монгол наадам эхэлж байгаа энэ өдөр амжилт, ялалт, билэгтэй сайхнаа хэлэлцэж, наадамлаж байгаа наадамчдадаа өлзийтэй ерөөл өргөн дэвшүүлье. Монгол түмний баяр цэнгэлийн дээд болсон баяр наадам ийнхүү эхэлж байгааг их цагаан сүлднийхээ цэнгэн орших энэхүү индрээс даяар олондоо тунхаглан зарлаж байна. Мөнх хөх тэнгэр манай ард түмнийг мөнх ивээг” гэлээ.