“Улаанбаатар палас” болон “Дүүхээ” төвийн барилгыг халдваргүйжүүлжээ

Нийслэлийн онцгой комиссын өчигдрийн хуралдаанаар Нийслэлийн Засаг дарга бөгөөд Улаанбаатар хотын захирагч Д.Сумъяабазар коронавирусээр халдварласан нь тогтоогдсон иргэний хоёрдугаар хавьтлын байрууд, явсан газруудад ариутгал, халдваргүйтлийг сайтар хийхийг Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөрт үүрэг болгосон. 

Засаг даргын өгсөн үүргийн дагуу хоёрдугаар хавьтлын эрсдэл бүхий обьект болох МУБИС-ийн хичээлийн байр, лицей сургуулийн байр, дотуур байрнуудын нийт 32339.52 м/кв талбайг халдваргүйжүүлж, ариутгалаа. 

Мөн “Улаанбаатар палас”-ын гадна болон дотор орчны 4000 м/кв газар, “Дүүхээ” төвийн барилгыг халдваргүйжүүлэв. Дээрх обьектуудад Зооноз өвчин судлалын үндэсний төв, Ариутгал халдваргүйтгэлийн мэргэжлийн холбоотой хамтран халдваргүйжүүлэх гэрэл, мананцар үүсгэгч, компрессор, автомакс багажуудаар ариутгалыг бүрэн хийж дууслаа.

Түүнчлэн Улаанбаатар хотын хог хаягдлын үйлчилгээний байгууллагууд, золбин нохой муур устгалын байгууллагын ажилчдыг хамгаалах хэрэгслээр бүрэн хангаж, хог тээврийн автомашинуудыг ариутгаж, халдваргүйтжүүлэв.