Коронавирусний шинжилгээ өгөх цагийг ЦАХИМААР АВАХЫГ зөвлөлөө

Э.Мөнхжин | Zindaa.mn
2020 оны 11 сарын 17

Коронавируст халдварын нөхцөл байдлын талаар ЭМЯ-наас 17:00 цагийн  мэдээллээ өглөө. /2020.11.17/

Өглөөний 11:00 цагаас хойш коронавирусний халдварын тохиолдол НЭГЭЭР нэмэгдэж, Монгол Улсад бүртгэгдсэн нийт тохиолдол 435 болсон байна.

Улаанбаатар хотод 18 цэгт, Өрхийн эмнэлгүүд дээр коронавирусний шинжилгээ авч байгаа бөгөөд шинжилгээ өгөх цагаа цахимаар авахыг ЭМЯ-аас зөвлөлөө.

Мөн сүүлийн өдрүүдэд бага насны хүүхдүүдэд гар, хөл, амны өвчин, салхин цэцэгийн халдвар нэмэгдэх хандлагатай байгааг мэдээллийн үеэр дурдлаа.

Нийслэлийн Эрүүл мэндийн газраас 2020.11.14-ний өдрөөс эхлэн нийслэлийн хэмжээнд коронавируст “Ковид-19” халдварын шинжилгээний төвийг 18 цэгт байгуулан, халдварын эрсдэл бүхий ойрын болон дам хавьтлуудыг харьяа дүүрэгт нь шинжилгээнд хамруулах ажлыг зохион байгуулж байгаа. Энэ дагуу Нийслэлийн Онцгой комиссын шуурхай штабаас Нийслэлийн үйлчилгээний нэгдсэн төв-Дүнжингарав салбарт зохицуулалт хийж, 75751200 дугаарын утсаар зөвлөгөө мэдээлэл өгөх болон шинжилгээний цаг олгох ажлыг хийж байна. 
 

ТҮРГЭВЧИЛСЭН БОЛОН PCR ШИНЖИЛГЭЭ АВАХ 11 ЦЭГИЙН БАЙРШИЛ
 

  • Сүхбаатар дүүрэг: Дамбадаржаа дахь Эрүүл мэндийн төвийн сувилал
  • Баянгол дүүрэг: Эмүжин төв
  • Хан-уул дүүрэг: Яармаг дахь Эрүүл мэндийн төвийн салбар амбулатори 
  • Сонгинохайрхан дүүрэг: Жишиг нэгдсэн эмнэлгийн байр
  • Сонгинохайрхан дүүрэг: Эрүүл мэндийн төвийн харьяа салбар амбулатори-2
  • Баянзүрх дүүрэг: Сүрьеэгийн диспансер 
  • Баянзүрх дүүрэг: 26 ортой хүүхдийн эмнэлэг 
  • Чингэлтэй дүүрэг :Эрүүл мэндийн төвийн Мэс засал, гэмтлийн тасаг 
  • Багахангай дүүрэг: Эрүүл мэндийн төвийн хуучин захиргааны барилга
  • Налайх дүүрэг: Эрүүл мэндийн төвийн амбулаторийн хуучин байр 
  • Багануур дүүрэг: Эрүүл мэндийн төвийн халдвартын тасгийн байр


НЭМЭЛТЭЭР БАЙГУУЛСАН 7 ЦЭГИЙН БАЙРШИЛ
 

  • Сонгинохайрхан дүүрэг: 12 дугаар хорооны Өрхийн эрүүл мэндийн төв
  • Чингэлтэй дүүрэг: 15 дугаар хорооны Өрхийн эрүүл мэндийн төв
  • Баянгол дүүрэг: 46 дугаар сургууль
  • Баянгол дүүрэг: 20 дугаар сургууль
  • Сүхбаатар дүүрэг: 3 дугаар сургууль /Монгол/
  • Баянзүрх дүүрэг: 14 дүгээр сургууль
  • Хан-Уул дүүрэг: 18 дугаар сургууль

 

Top