Эрүүл мэндийн яам 17.00 цагаас мэдээлэл хийхдээ төмөр зам дагуу илэрсэн голомтын ойрын болон хоёрдогч хавьтлуудыг тогтоох ажил үргэлжилж байгааг онцоллоо. 

Төмөр замын дагуух төв суурийн газруудад халдвар нэмж бүртгэгдсээр байгаа учраас төмөр замын ойролцоох орон нутагт амьдарч, оршин сууж байгаа хавьталд орсон хүмүүс биеийн байдалдаа хяналт тавих, шинжилгээнд хамрагдах шаардлагатай байгааг ЭМЯ онцолж байна. 

Улсын нэгдүгээр төв эмнэлэг COVID-19 халдварын улмаас бүх нийтийн бэлэн байдлын зэрэгт шилжсэн үед ард иргэдийг халдварын эрсдэлээс сэргийлж, шаардлагагүй тохиолдолд эмнэлгийг зорьж ирэхгүй байх нөхцөлийг бүрдүүлж, цахим зөвлөгөөг хүргэж эхэлжээ. Тус эмнэлэгтэй 89891891 дугаарын утсаар холбогдож болох юм. 

Иргэн та шаардлагатай тохиолдолд гэрээсээ гарсан бол орж ирэхдээ үедээ юуг анхаарах талаар Эрүүл мэндийн яамнаас дараах зөвлөгөөг хүргэж байна. 

COVID-19: Гэртээ байхдаа болон ГАДНААС орохдоо анхаарах зүйлс
 

ГЭРТЭЭ ОРОХ ҮЕД

• Гэртээ гадуур өмссөн гуталтай явахгүй байх
• Хувцсаа гэртээ сэгсрэхгүй байх
• Хэрэглэсэн нэг удаагийн амны хаалтыг уутанд хийж, тагтай хогийн саванд хаях
• Бага насны хүүхдийг тэвэрч, үнсэхгүй байх
• Гараа савандаж угааж, халдваргүйжүүлсний дараа хүүхэдтэйгээ харьцах
• Давс, сода, нимбэгний уусмалаар ам, хоолойгоо зайлах
• Даавуун амны хаалтыг савандаж угааж, индүүдэх

ГЭРТЭЭ БАЙХ ҮЕД

• Худалдаж авсан бүтээгдэхүүний сав, баглаа боодлыг сайтар арчих
• Жимс, хүнсний ногоог урсгал усанд сайтар угаах
• Хүний гар олон хүрэлцдэг хэсгийг угааж цэвэрлэх, халдваргүйжүүлэх
• Ор хөнжлийн даавуу, алчуурыг угааж, индүүдэж хэрэглэх
• Бие засах газар гэрийн гадна байрладаг бол гэрийн шаахайгаа солих

КОВИД-19 халдвараас сэргийлэх НЭГДСЭН ЗӨВЛӨМЖ, ЗӨВЛӨГӨӨГ энэхүү холбоосоос авах боломжтой.