НОК: Түгээлтийн машиныг 10:00-17:00 цагт зорчихыг ЗӨВШӨӨРЛӨӨ

Нийслэлийн Онцгой комиссын хуралдаанаар өчигдөр /2020.11.20/ хүнс, эмийн түгээлтийн автомашинуудыг хэрхэн зорчуулах, худалдаа эрхлэгч, нийлүүлэгч талдаа хүндрэлгүй зохицуулах талаар хэлэлцэж, дараах шийдвэрийг гаргажээ.

УОК-оос хатуу хөл хорио тогтоож, нийслэлд автомашин, иргэдийн хөдөлгөөнийг тодорхой цагт зорчуулахаар зохицуулсантай холбогдуулан хүнс, эмийн төрлийн бараа бүтээгдэхүүний түгээлт, ханган нийлүүлэлтийг 22:00-06:00 буюу шөнийн цагаар хийх болсон.  Үүнээс улбаалан хүнс үйлдвэрлэл, худалдааны төвүүд, ялангуяа хотын захын жижиг дэлгүүрүүдэд багагүй бэрхшээл үүсээд байсан юм. 

Тэгвэл Нийслэлийн онцгой комиссын хуралдааны шийдвэрээр өнөөдөр (2020.11.21) өглөөнөөс эхлэн хүнсний болон эмийн түгээлтийн хязгаарлалтыг сулруулж, 10:00-17:00 цагт хийхээр болов.

Үйлдвэрлэгчдийн түгээлтийн машинуудыг нэг хоногт багтаан QR кодтой болгож, холболт хийсний үр дүн бүртгэлжүүлж дууссан байна.

Найман нэрийн болон зургаан нэрийн нийт 3731 дэлгүүрийн 10 мянга орчим машины бүртгэл, холболтын ажлыг хийжээ. QR кодоороо цаашид бүх үйлчилгээнд бүртгүүлдэг болох ажлыг эрчимжүүлж байгаа.

Нийслэлийн онцгой комиссоос нийтийн тээврийн ачааллыг бууруулах талаар хэлэлцэж, холбогдох саналыг цуглуулан ажиллаж байна. Улмаар саналаа гарган Улсын онцгой комисст танилцуулах аж.