ШУУД: Улаанбаатарт халдварын 11 тохиолдол нэмж бүртгэгдлээ

З.Тэмлүүн | Zindaa.mn
2020 оны 11 сарын 23

Эрүүл мэндийн яамнаас коронавирусний тархалт, нөхцөл байдлын талаар мэдээлэл хийж байна. (2020.11.23, 11.00 цаг)

Улаанбаатар хот болон орон нутаг дахь лабораторийн шинжилгээгээр өчигдөр 17.00 цагаас хойш коронавирусний 11 тохиолдол нэмж бүртгэгдэн, нийт халдварын тохиолдол 640 боллоо. Энэ 11 тохиолдол Улаанбаатарт илэрсэн байна. Шинжилгээгээр орон нутагт халдвар нэмж бүртгэгдээгүй. 

ХӨСҮТ-ийн Тандалт, судалгааны албаны дарга А.Амбасэлмаа "Арваннэгдүгээр дүгээр сарын 22-нд улсын хэмжээн дэх лабораториудад 3011 хүнд PCR шинжилгээ хийсэн. Дархан-Уул аймагт өчигдрийн 17:00 цагаас хойш халдварын тохиолдол нэмж бүртгэгдээгүй, 20 тохиолдолтой хэвээр байгаа. Мөн Дорноговь, Орхон аймагт нэмж тохиолдол бүртгэгдээгүй бөгөөд тус тус 17 тохиолдолтой байна. Говьсүмбэр аймагт шинээр халдвар нэмэгдээгүй, 1 тохиолдолтой байгаа. Сэлэнгэд нийт 98 тохиолдол хэвээр байна. Тус аймагт шинжилгээ, судалгаа үргэлжилж байна.  Харин Улаанбаатар хотод 11 хүнд коронавирусний халдвар шинээр илэрлээ. Эдгээр нь батлагдсан тохиолдлын ойрын хавьтлын хүмүүс байгаа. Гурван хүнд хоёр дахь удаагийн шинжилгээгээр халдвар илэрсэн. Бусад нь 20, 21-нд батлагдсан тохиолдлын ойрын хавьтал байлаа. Халдварын батлагдсан тохиолдлын ойрын хавьтлуудыг 24-48 цагийн дотор олж, тусгаарлаж байгаа. Одоогийн байдлаар батлагдсан тохиолдлын нэгдүгээр хавьтал 883 хүнийг тусгаарлаж, үүнээс 39 хүнд гурав дахь давтан шинжилгээг хийгээд байна" гэв. 

Тэрбээр мөн "Улаанбаатарт илэрсэн 11 тохиолдлын хавьтлыг тусгаарласан. Батлагдсан тохиолдлууд бидэнд гэрийн хаяг, бусад мэдээллийг тодорхой хэлснээс болж гэр бүл рүү нь хүмүүс утасдах зэргээр хүний эрхэнд халдаж байна гэж гомдол мэдүүлдэг. Хавьтлуудын байрлалыг бид дүүргээр нь мэдээлж байгаа. Тухайн газруудад тэр бүрт нь хяналт тавьж байгаа. Төмөр зам, Сонгинохайрхан дүүргийн хавьтлаас энэ 11 тохиолдол илэрсэн. Энэ хүмүүсийг 20, 21-нд тусгаарласан байсан. Сэлэнгэ аймагт хоёр гол голомт байгаа. Аймгийн төв болон Мандал сум. Сэлэнгэ аймагт ялгаагүй маш нарийн хяналт тавьж байгаа" гэсэн мэдээлэл өглөө. 

2020.11.23-ны 11:00 цагийн байдлаар 
 

Нийт халдварын тохиолдол - 640

Дотоодын халдварын тоо - 204
 

  • Улаанбаатар - 51
  • Сэлэнгэ - 98
  • Дархан-Уул -20
  • Говьсүмбэр - 1
  • Орхон - 17
  • Дорноговь - 17

ШУУД ҮЗЭХ

 


Өчигдөр буюу 2020.11.22-ны 17:00 цагийн байдлаар халдварын тархалт дараах дүн мэдээтэй байв.
 

Нийт халдварын тохиолдол - 629

Дотоодын халдварын тоо - 193
 

  • Улаанбаатар - 40
  • Сэлэнгэ - 98
  • Дархан-Уул -20
  • Говьсүмбэр - 1
  • Орхон - 17
  • Дорноговь - 17
Top