Сөүлээс эм, эмнэлгийн бүтээгдэхүүн татахыг МИАТ-д үүрэг болгов

“Улаанбаатар төмөр зам” ХНН-т “Ковид-19” халдварт өвчин үүссэн нөхцөл байдалтай холбогдуулан тус салбарын бэлэн байдлыг дээшлүүлж, тандалт судалгаа хийн тархалтыг зогсоох, халдвар хамгааллын дэглэмийг мөрдүүлж, холбогдох шийдвэрийн хэрэгжилтийг хангуулах чиг үүрэг бүхий Шуурхай бүлгийн хурал болов.

Сайдын түрүүчийн шуурхай зөвлөгөөнөөс өгөгдсөн 11 үүрэг, даалгаврын тав нь 100, тав нь 70, нэг нь 30 хувийн биелэлтэй байна.

Энэ удаагийн шуурхай зөвлөгөөн дээр Зам, тээврийн хөгжлийн сайд Л.Халтар салбарын бодлого, төлөвлөлтийг эрс сайжруулах, ажлын хариуцлага, зохион байгуулалт, уялдаа холбоог дээшлүүлэх, өгч буй үүрэг даалгаварт хариуцлагатай хандах, хүлээгдэж байгаа зарим ажлыг эрчимжүүлэх чиглэлээр тодорхой үүрэг, чиглэл өгөв.

Ялангуяа, Гурван барилгын асуудлаа шийдэж, энэ онд багтан ашиглалтад оруулах, Хөдөлгөөний диспетчерүүддээ анхаарал хандуулж, тэднийг дархлаа дэмжих бүтээгдэхүүнээр хангах, ажилдаа гарах үед нь эмнэлгийн үзлэгт тогтмол хамруулахыг Иргэний нисэхийн ерөнхий газарт, Япон руу үйлдэх нислэг, Сөүлээс эм, эмнэлгийн бүтээгдэхүүн, хэрэгсэл татах нислэгийн бэлтгэлийг сайтар хангахыг “Монголын иргэний агаарын тээвэр” ТӨХК-д, Цагаанхадын боомтод онцгой дэглэм тогтоож байгаатай холбогдуулан уртын болон богинын тээвэрт явж байгаа жолооч нарыг хавьталд оруулахгүй байх асуудалд онцгой анхаарч, тээвэр зохицуулах хүмүүсийн ээлжээр ажиллах нөхцөл байдлыг хяналтын байгууллагуудтай хамтарч сайтар зохион байгуулах, хяналт тавих, Замын-Үүд дээр үүссэн нөхцөл байдал сайнгүй байгаа учир зохион байгуулалтад анхаарч, жолооч нарын цалин, нийгмийн асуудлын талаар ачаа хүлээн авагч нартай тохирч, тодорхой болгох, Сонирхол татсан дугааруудын дуудлага худалдааг хэрхэн, яаж зохион байгуулах, дотооддоо мөрдөх журмыг нэн даруй боловсруулж бэлэн болгохыг “Авто тээврийн үндэсний төв” ТӨҮГ-т, Төлбөр хураах бүх цэгийг цахимжуулах ажлыг эрчимжүүлж ирэх оны нэгдүгээр сарын 1 гэхэд бүх төлбөр хураах цэг цахим хэлбэрт шилжсэн байхыг “Зам тээврийн хөгжлийн төв” ТӨҮГ-т, Онгоц өнгөрүүлэлтийн үеийн горим алдагдсан тухай, Бээжинд онгоц ослын буулт хийсэн тухай дүгнэлтийг яаралтай гаргаж танилцуулахыг Нислэгийн осол зөрчлийг шинжлэн шалгах албанд, “МТЗ”-ын Төмөртэй өртөөн дээр ажилласан ЗТХЯ, МТЗ, УБТЗ-ын ажлын хэсгийн дүгнэлтийг танилцуулахыг ЗТХЯ-ны Хяналт-шинжилгээ, үнэлгээ, дотоод аудитын газарт, Европын сэргээн босголт, хөгжлийн банкны санхүүжилтээр баригдах Улаанбаатар-Дархан чиглэлийн замын бэлтгэлийг хангуулах, өвөл хийх ажлын төлөвлөгөө гаргахыг ЗТХЯ-ны Авто замын бодлогын хэрэгжилтийг зохицуулах газарт үүрэг болгов.

Сайд эдийн засгийг эрчимжүүлэх тогтоолуудын биелэлт, “Ковид-19” халдварт вирусээс үүдэн бүх нийтийн бэлэн байдлын зэрэгт шилжүүлснээс хойш Засгийн газар, Улсын онцгой комисс, Зам, тээврийн хөгжлийн яамнаас гаргасан тушаалын биелэлтийн талаар мэдээлэл бэлтгэх, Бүх байгууллага амьжиргааны түвшин доогуур, өрхийн орлого бага ажилтнуудынхаа судалгааг гаргаж, анхаарал хандуулж, туслалцаа дэмжлэг үзүүлэх үүрэг өглөө.

Эх сурвалж: ЗАМ, ТЭЭВРИЙН ХӨГЖЛИЙН ЯАМ