Төсвийн алдагдал 3 их наяд 259 тэрбум төгрөг боллоо

Монгол Улсын нэгдсэн төсвийн тэнцвэржүүлсэн орлого ба тусламжийн дүн 2020 оны эхний  арван сарын гүйцэтгэлээр 7,556.3 тэрбум төгрөг, нийт зарлага ба эргэж төлөгдөх цэвэр зээлийн хэмжээ 10,815.3 тэрбум төгрөг болж,  төсвийн тэнцвэржүүлсэн нийт тэнцэл 3,259.0 тэрбум төгрөгийн алдагдалтай гарсан байна.

Төсвийн тэнцвэржүүлсэн тэнцлийн алдагдал өмнөх оны мөн үеэс 3,804.4 тэрбум төгрөгөөр нэмэгдсэн бол төлөвлөсөн дүнгээс 1,749.3 тэрбум төгрөгөөр буурчээ.

ТАЙЛБАР: Нэгдсэн төсвийн гүйцэтгэл  / тэрбум төгрөг/ 

Нэгдсэн төсвийн нийт тэнцвэржүүлсэн орлого 7,556.3 тэрбум төгрөгт хүрч өнгөрсөн оны мөн үеэс 14.6 хувь буюу 1,287.7 тэрбум төгрөгөөр буурч, тайлант хугацааны орлогын төлөвлөгөө 5.6 хувь буюу 451.6 тэрбум төгрөгөөр дутуу төвлөрчээ.

Нийт тэнцвэржүүлсэн орлогын төлөвлөгөөний биелэлтийг төсвийн шатлал бүрээр авч үзвэл:

• Улсын төсөв 11.8 хувь буюу 722.5 тэрбум төгрөгөөр
• Орон нутгийн төсөв 12.2 хувь буюу 357.9 тэрбум төгрөгөөр
• Эрүүл мэндийн даатгалын сангийн төсөв 15.3 хувь буюу 64.8 тэрбум төгрөгөөр тус тус төлөвлөснөөс дутуу төвлөрчээ.
• Харин  Нийгмийн даатгалын сангийн төсөв 21.7 хувь буюу 280.6 тэрбум төгрөгөөр төлөвлөснөөс давж биелсэн байна.

Өмнөх оны мөн үеэс улсын төсвийн нийт зарлага 1,928.8 тэрбум төгрөгөөр, орон нутгийн төсвийн зарлага 204.9 тэрбум, нийгмийн даатгалын сангийн зарлага 329.9 тэрбум, эрүүл мэндийн даатгалын сангийн зарлага 60.2 тэрбум төгрөгөөр тус тус нэмэгдэж зарцуулагдсан үзүүлэлттэй байна.

Нэгдсэн төсвийн нийт зарлага ба цэвэр зээлийн дүн өнгөрсөн оны мөн үеэс 30.3 хувь буюу 2,516.8 тэрбум төгрөгөөр өсөхөд эргэж төлөгдөх төлбөрийг хассан цэвэр зээл 166.3 тэрбум төгрөгөөр буурсан ч урсгал зардал 2,095.4 тэрбум, хөрөнгийн зардал 587.7 тэрбум төгрөгөөр тус тус нэмэгдсэн нь нөлөөлжээ.

Зээлийн үйлчилгээний төлбөр өнгөрсөн оны мөн үетэй харьцуулахад 36.0 тэрбум төгрөг буюу  4.7  хувиар нэмэгдсэн бол тайлант хугацааны төлөвлөсөн дүнгээс 35.8 тэрбум төгрөгөөр буюу 4.3 хувиар дутуу зарцуулалттай гарчээ.